La Xunta aprueba una Comisión especial pa la promoción de la llingua asturiana

La Xunta de Voceros aprobó esti llunes, a propuesta d’IX, la creación d’una Comisión especial pa la normalización, protección y promoción de la llingua asturiana. La comisión foi sofitada por PSOE, Podemos y Foru amás del grupu proponente d’IX.

Según esplicó la diputada d’IX, Concha Masa, en declaraciones a los medios, esta comisión sedría complementaria al nuevu organigrama de la conseyería al traviés del cual quier sofitase la llingua asturiana.

“Sedría complementaria y yá que la cooficialidá nun paez que tea nel programa d’esta Llexislatura como sedría’l deséu d’IX, polo menos qu’en toles facetes posibles se trabaye sobre la protección y promoción de la llingua asturiana”, dixo Masa.

Dende Podemos diose’l sofitu a esta comisión, anque según destacó la so diputada, Lucía Montejo, “ye insuficiente y respuende a un pactu de PSOE y IX de llavadura de cara”.

Asina Podemos pidió “dir más allá nesti asuntu” y propunxo desenvolver la Llei aprobada y abrir un procesu de reforma del estatutu que dexe garantizar los derechos en materia llingüística n’Asturies pa toles persones”.

Oposición de PP y C’s

Tanto’l Grupu parlamentariu del PP como’l de Ciudadanos votaron en contra de crear esa comisión. Dende’l PP, el voceru Agustín Cuervas Mons destacó que nun ye qu’el so grupu nun considere importante esti asuntu, sinón que “envalora que nun ye una prioridá nesti momentu nes esmoliciones de los asturianos”.

Amás dende’l PP consideren qu’hai otros mecanismos como’l desenvolvimientu de la llei qu’esiste al respective en llugar de cargar el parlamentu de comisiones especiales.

Similar foi l’argumentu del voceru de Ciudadanos, Nicanor García, qu’indicó que’l so grupu votó en contra de la constitución de la comisión al considerar qu’esi asuntu “nun ye de nenguna prioridá”.

“Tamos a favor de les midíes que favorezan l’usu y la promoción del bable y el patrimoniu cultural asturianu pero paeznos que poner la comisión específica ye da-y rangu de primer nivel a una cuestión que pa nós nestos momentos nun ye prioritaria”, dixo García.

(d’Europa Press, 31-08-2015)