Antón García gana’l Premiu Xuan María Acebal de Poesía n’Asturianu

L’escritor Antón García ganó’l Premiu Xuan María Acebal de Poesía n’Asturianu, dotáu con 3.000 euros. El xuráu encargáu de valorar los ocho obres finalistes tuvo presidíu pol director xeneral de Planificación Llingüística y Normalización, Fernando Padilla, ya integráu polos escritores Pablo X. Suárez, Elías Veiga, Esther Prieto y Ánxeles Carbajal, amás del filólogu Xosé Miguel Suárez.

A esti galardón podíen presentase poemarios de tema, xéneru y estructura llibres, escritos en llingua asturiana con una estensión mínima de quinientos versos, siempres que fueren inéditos y non premiaos n’otros concursos, indiquen dende’l Gobiernu del Principáu en nota de prensa.

Ente les obres presentaes, el xuráu decidió por mayoría conceder el premiu al poemariu tituláu Ferralla, nel que según esplica l’acta enceta un tópicu poéticu como’l de la muerte usando una estructura orixinal, de gran fuerza espresivo y con referencies cultes y populares perfectamente engarzadas”. La obra foi presentada sol seudónimu La Vieya Zuna. Abierta la plica, l’autor ganador resultó ser Antón García.

Antón García (Tuña, Tinéu, 1960) ye llicenciáu en Filoloxía Española pola Universidá d’Uviéu. La so obra poética arrinca cola edición en 1984 de Estoiru y ta recoyida en 2007 nel volume La mirada aliella (Poesía aconceyada 1981-2006), onde inclúi los sos otros dos poemarios publicaos, Los díes repitir y Tierra adientro, con un prólogu de José Luis Piquero. En 2011 publicóse una amplia antoloxía de la so obra n’edición billingüe sol títulu La mirada atenta / La mirada aliella, con prólogu de Araceli Iravedra.

La so obra poética ta traducida a diverses llingües: francés, catalán, gallegu, portugués, vascu, rusu, occitanu, alemán y bretón. Tradució al asturianu poesía de diversos poetes y llingües, destacando los volumes dedicaos a Eugénio de Andrade (Esquíteslos enceses, 2014) y a Joan Vinyoli (Xuegos p’apostalgar la muerte, 2015).

Antón García dirixe la revista de cultura Riolo de los Coríos y foi ganador en 2014 del premiu de novela Xosefa Xovellanos cola obra Crónica de la lluz y la solombra.

(d’El Digital de Asturias, 28-11-2015)