La Oficina de Normalización Llingüística celebra’l xueves 28 d’abril, ente les 10:00 y les 13.30 hores, los XIII Alcuentros de la Mocedá cola Llingua. Esti añu los alumnos y les alumnes d’Enseñanza Secundaria de Gijón/Xixón van dir a sacar la llingua al Xardín BotánicuAtlánticu y contarán con más de venti monitores especializaos pa que la xornada seya un ésitu.
Casi quinientos alumnos y alumnes de 11 Institutos y un colexu concertáu de la ciudá van participar nes actividaes pensaes pa ellos/es nel Botánicu. Van facer un percorríu pel xardín p’aprender los nomes de les plantes y la vexetación de cada fastera y tamién van xugar a los xuegos tradicionales asturianos cola Asociación Esvilla y escuchar un conciertu d’El Koku la bandina.
Coles diferentes actividaes del proyeutu “Saca la llingua” que se fai por decimotercer añu consecutivu y que ta basáu na participación y na tresversalidá, pretendemos que la mocedá s’avere a la llingua asturiana dende un aspeutu que nun seya puramente académicu y qu’entame a entendela como una ferramienta normal de comunicación al tiempu que va poder disfrutar de les distintes propuestes que guarden rellación con ella: música, teatru, videu, lliteratura…
Tolos años al rodiu del día de Les lletres Asturianes se fai esta actividá empobinada a los alumnos y les alumnes d’Enseñanza Secundaria Obligatoria y Bachilleratu. La mayor parte de la mocedá qu’estudia asturianu nos institutos de Gijón/Xixón, xuntáronse otros años nel teatru Xovellanos,a Llaboral, ciudá de la Cultura o nel Muséu Etnográficu del Pueblu d’Asturies.
En definitiva, una xornada pa esfrutar, deprender, compartir y vindicar, na que l’asturianu y la mocedá son los protagonistes.
(del Oficina de Normalización Llingüística del Ayuntamientu de Xixón, 27-04-2016)
Tierra alantre, la mesma fala 
Deixar ua Respuosta