Una llingua pa cuntar el mundu

VANESSA GUTIÉRREZ

Pablo Picasso, creador del cubismu y una de les figures más grandes de la historia del arte, midía la calidá d’un pintor acordies a la cantidá de pasáu que llevare consigo. Entrambes coses, calidá y cantidá, van de la mano na magnífica pinacoteca del Muséu de Belles Artes d’Asturies qu’ayer fue l’escenariu de la inauguración de la XXXVII Selmana de les Lletres Asturianes con un itinerariu dedicáu a los maestros de la pintura universal.

De Picasso al Maestru de Palanquinos, pasando per Joan Miró, Salvador Dalí, Francisco de Goya, Joaquín Sorolla, Bartolomé Esteban Murillo o John Phillip, tres de contemplar la Fonte de la Rúa -la estraordinaria ayalga la época romana qu’apaeció gracies a les obres d’ampliación del centru-, apreciar de cerca un elegante vistíu diseñáu por Balenciaga o conocer la primer representación en pintura de dos asturianos na obra ‘Círculu del Maestru de la lleenda de la Magdalena’. La visita percorrió les referencies imprescindibles de la cultura presente, pa poner en valor al mesmu tiempu cómo éstes fueron frutu de l’asimilación de la tradición y la inspiración de los que van en vanguardia. Toa una declaración d’intenciones na primer actividá organizada pa la celebración que va durar hasta’l próximu 10 de mayu. Y ye que posiblemente nada cunte l’alma y la historia del ser humanu como lo puede facer l’arte. D’ehí’l valor simbólicu de que’l magníficu compendiu fuere guiáu n’asturianu pol especialista Denis Soria que, con humor y amor, s’encargó de dir glosando la técnica de cada obra, la relevancia de cada pintor y la intrahistoria qu’escuende toa creación, permitiendo a los espectadores algamar la complicidá necesaria non solo pa mantener l’atención sobre l’amuesa, sinón pa sentir lo contemplao como dalgo propio y poner en valor esi arrequecimientu.

Col aforu completu nesta visita que per primer vez se puede facer tamién col folletu en llingua asturiana, los espectadores esfrutaron amás de les posibilidaes qu’ufierten los espacios nuevos a la hora d’enfrentase a la inigualable maestría d’El Greco, al xeniu de Francisco de Zurbarán o al siempre poco reconocíu Luis Fernández. Pero ensin duda lo que más agradeció’l públicu qu’ayer ocupaba les sales del muséu -ente’l que s’encontraba’l director de Planificación Llingüística y Normalización, Fernando Padilla, y del que presta señalar que non tou yera d’orixe asturianu-, fue la oportunidá d’interpretar el llinguaxe pictóricu dende l’idioma maternu. Un síntoma de normalidá, de tresversalidá y de posibilidá pa una llingua cargada de pasáu que, como demostró, nun ha de renunciar a nenguna opción de presente. Ye por ello que la exitosa actividá va volver repitise’l próximu domingu día 7 a les 12 hores esta vez pel itinerariu ‘Maestros de la pintura asturiana’, mentes que’l Muséu Arqueolóxicu va cuntar con otres dos visites, hoy y el 8 de mayu, tamién a les 12 hores, pa repasar ‘Del Paleolíticu a Roma’ y ‘Del altumedievu al baxumedievu’, respectivamente. Una esperiencia formidable y que nun dexa duda de que si tamién la calidá d’un pueblu se mide pola cantidá de pasáu que lleva dientro, el patrimoniu asturianu, ayer cola andecha ente lo material de lo artístico y lo inmaterial del idioma propiu, fixeron a Asturies una tierra más buena y, culturalmente, un país más grande.

El programa

Hoy. 12 hores, visita guiada n’asturianu al Muséu Arqueolóxicu.

Llunes. 20 hores, ‘País malva’, espectáculu musical a cargu del grupu Muyeres. Teatru Nuevu de La Felguera (Llangréu).

Martes. 10 hores, visites guiaes n’asturianu pa escolinos a la Xunta Xeneral del Principáu. A la misma hora, visites guiáes pol cascu históricu d’Uviéu. 19.30 hores, presentación de ‘Ferralla’ d’Antón García, entrega de diplomes del premiu poesía pa escolinos de la Selmana de les Lletres y actuación de músicos del Conservatoriu d’Uviéu. En la capiella los Dolores de Grau, cola collaboración de l’Aula de les Metáfores.

Miércoles. 10 hores, visites guiaes n’asturianu pa escolinos a la Xunta Xeneral. A la misma hora, visites guiáes por Cimavilla, en Xixón. 12 hores, llectura institucional de testos n’asturianu y gallego-asturianu. 19 hores, presentación de ‘Fontonebrosa’, de Vicente García Oliva, en CMI La Arena (Xixón). 19 hores, ‘Muyeres y fueyes’, teatru nel Teatru Municipal de Samartín del Rei Aurelio. 19 hores, presentación de ‘Vértigu. L’atracción del abismu na sociedá contemporánea’, de José Ángel Gayol.

Xueves. 12 hores, feria de llibru y el discu n’asturianu. Plaza Domingo Álvarez Acebal d’Avilés. 18 hores, entrega premios de teatro pa escolinos y representación de obres. Teatru de la Laboral, Xixón.

Vienres. 12 hores, actu escolar institucional del Día de les Lletres. Institutu de Morea (Aller). 19.30, Manifestación ‘L’asturianu llingua oficial’, con salida de la estación del Norte, Uviéu. 20.30 hores, actu institucional de l’Academia de la Llingua Asturiana nel Teatru Campoamor.

Sábadu 7. 12 hores. Visites guiáes al Bellas Artes. 19 hores, espectáculu musical ‘Bestiariu’ con diez grupos asturianos nel Teatru Vital Aza de Pola L.lena.

Domingu 8. 12 hores. Visites guiáes al Bellas Artes.

(d’El Comercio, 01-05-2016)