El Principáu quier promover l’asturianu como llingua vehicular na enseñanza y nos informativos de la TPA

El puxu del asturianu como llingua vehicular na enseñanza, a traviés d’un programa que se pondrá en práctica’l cursu qu’entra, y la so utilización nos informativos de la Radio Televisión del Principáu d’Asturies son dos de les cuestiones que’l conseyeru d’Educación, Genaro Alonso. Fízolo na so intervención na Comisión d’Estudiu del Réxime de Protección de la LLingua, celebrada na Xunta Xeneral.

Según desarrolló dempués el director xeneral de Política Llingüística, Fernando Vallina, tamién presente na Comisión, ocho centros d’enseñanza tomarán parte nesti programa pilotu de magar el próximu cursu. Nél impartiránse dalgunes asignatures d’enseñanza primaria n’asturianu.

Matizó tamién que na mayor parte de los casos nun va suponer gastu adicional, pero n’algunos de los centros pue necesitase media xornada n’educación primaria.

Per otra parte, nel turnu de preguntes, el conseyeru esplicó que’l Gobiernu ta na llinia de “que la TPA tenga informativos n’asturianu, dalgo cargao “de razón y de xusticia”, aunque “nun ye fácil” porque “hai resistencies”. Foi un tema nel que tamién recalcaron los otros dos comparecientes, Vallina, y la directora xeneral d’Universidades, Cristina del Valle. Esta última reclamó más doblaxes, tanto pa la televisión como pa tornar videoxuegos al asturianu, porque “tenemos unos estudios de doblaxe de muncha calidá”.

El conseyeru destacó les tresmisiones deportives n’asturianu y otros proyectos desarrollaos en medios de comunicación, y criticó lo mesmo la disglosia que l’empléu del asturianu esclusivamente pa conteníos “risibles o rurales”, “dalgo perverso”.

Calcó na so crítica a la disglosia que se da “munches veces” na televisión pública, y también na so posición contraria en que namás s’use l’asturianu pa situaciones risibles o rurales, “dalgo perverso”.

El conseyeru avanzó una serie de midíes que punxo en marcha’l Gobiernu d’Asturies col propósitu de fomentar, promover y espublizar l’usu del asturianu y del gallego-asturianu en tolos ámbitos sociales.

Especialidá

Sorrayó que sigue abierta la negociación col Executivu de Mariano Rajoy pa la creación de la especialidá docente de Llingua Asturiana y Lliteratura y anunció l’adaptación del asturianu al Marcu Común Européu de Referencia de les Llingües. Alonso esplicó que’l día 6 caltendrá una reunión col Ministeriu d’Educación pa tratar esta cuestión, que consideró básica pa meyorar la situación de los docentes d’asturianu.

Alonso, que compareció ante la comisión d’estudiu de la Xunta Xeneral sobre’l réxime de protección y promoción del asturianu y les sos distintes alternatives, aseguró que’l so departamentu va ellaborar un decretu que desarrolle tol procesu d’alquisición, convalidación, pruebes y reconocencia de los distintos niveles de competencia llingüística en llingua asturiana.

Tamién van ofrecese, al traviés del Institutu Asturianu d’Alministración Pública Adolfo Posada y otres instituciones capacitaes, cursos de formación continua pa personal del Principáu, y va procurase la publicación nel BOPA d’una versión n’asturianu de les distintes lleis, disposiciones o asunciones.

Per otra parte, Alonso recordó que mientres esta llexislatura haise dinamizado l’actividá de la Xunta Asesora de Toponimia, que s’axuntó en nueve causes. Hasta agora, 53 conceyos cunten yá cola toponimia oficial aprobada y publicada nel BOPA, 8 más col espediente de oficialización avanzáu, 13 en distintes fases del procesu de oficialización y oros 4 nun solicitaron l’apertura d’espediente.

El titular d’Educación valoró la función de les subvenciones destinaes a la promoción y normalización del asturianu y del gallego-asturianu. Ente otres, les ayudes pa medios de comunicación, educación musical, edición de llibros y entidaes locales. Amás, incidió en que cada añu convoquen premios a la creación en llingua asturiana.

Al respective de les relaciones cola sociedá civil, Alonso recordó qu’esta mesma tarde celebrará la Primer xornada de la edición n’asturianu y citó tamién el Primera alcuentru de ceadores dramáticos násturianu que va axuntar a autores dramáticos, grupos teatrales, promotores y actores p’ameyorar la presencia del teatru n’asturianu. Coles mesmes, va retomase, dempués d’una década, l’actividá de la Xunta d*escritores en llingua asturiana, nes que el autores alderiquen sobre la creación lliteraria.

A preguntes del voceru parlamentariu de Ciudadanos, Nicanor García, (únicu diputáu, xunto con Lucía Montejo, de Podemos, qu’usó l’asturianu en toles sos intervenciones), el conseyeru, qu’antes describiera la situación de la llingua como de “peligru inminente”, esplicó que tovía ye pronto pa saber si les midíes que se tán tomando tán dando resultaos” en materia de normalización social. Sicasí, mostróse convencíu de que los darán.

(d’Europa Press, 01-03-2017)