PABLO ANTÓN MARÍN ESTRADA
L’actu col que l’Academia de la Llingua celebra cada primer vienres de mayu el Día de Les Lletres tenía esti añu un calter esceicional. Adelantráralo la presidenta de la institución, Ana Cano, díes enantes y pela primer vez en munchu tiempu, el repás críticu a la situación llingüística dende la última celebración de les Lletres, nun foi el centru de l’atención nel discursu institucional del Teatru Campoamor, inda tampoco nun faltó. La llectura en positivo del momentu de la nuesa llingua tuvo ayer un nome propiu, el del escritor y collaborador de El Comercio Xuan Bello. Recibía el Premiu Nacional de Lliteratura nuna ceremonia na que les otres protagonistas foiron les autores n’asturiano y gallego-asturiano, y por estensión les muyeres del país, como tresmisores de la llingua.
«Altamente emocionáu», según les sos mesmes pallabres, recibió Xuan Bello el Premiu Nacional de Lliteratura Asturiana, representáu nun medallón diseñáu pol artista Adolfo Manzano y que-y foi entregáu al empiezu del actu del Campoamor. L’escritor fexo un discursu breve ya intensu nel que remembró los díes de l’adolescencia nos qu’escomenzó a descubrir la lliteratura y arriendes tamién la mesma llingua asturiana, na que diba escribir dende entós. Tuvo una alcordanza pa los primeros autores que lleó nel nuestru idioma: Manuel Asur y González Quevedo: «Los sos versos conxugaben cola mio alma», al igual que pal caderalgu Xosé Lluis García Arias, «padre de la filoloxía asturiana», al que-y llevó «temblando los mios versos una mañana».
Otros escritores más averaos n’edá ya n’inquietúes como Antón García, Berta Piñán diben ufrí-y «el privilexu de lleer y falar con otros cómplices de lo que se llee y escribe» y el so pasu pela terturlia Óliver la memebranza de «la conversación intelixente y de Víctor Botas y García Martín». Remató con un emotivu poema escritu apocayá d’un pescalina mercada pa llantar nel so xardín pola que naide apostaba y qu’al pesar d’ello llogróse: «Al pesar de les mios indecisiones, del avisu de la Sibila, vive: ye’l corazón del mundu que llate».
Al poeta de Paniceiros dedicó-y Ana Cano los sos primeros emponderamientos, calificándolu de «escritor d’una importancia ensin precedentes pa les nueses lletres y nel más universal». Unes palabres del críticu José Luis García Martín, pañaes del entamu al llibru d’homenaxe editáu por mor del premiu valieron pa sorrayar los méritos de la so obra: «tola hestoria de la lliteratura entra nesti llibru máxicu qu’añade realidá al ensuañu, secretos pasadixos a la realidá, que fai col mapa d’Asturies un coloríu barcu de papel y lu pon a navegar pelos mares del mundu».
ANEXU: Discursu de Xuan Bello na entrega del Premiu Nacional de Lliteratura Asturiana.
(d’El Comercio, 06-05-2017)
Tierra alantre, la mesma fala 
Deixar ua Respuosta