El xueves 27 de xunetu presentóse, na llibrería Santa Teresa d’Uviéu, el llibru Hestories pa contales (Más nomes de muyer) (Trabe), una antoloxía de rellatos que coordinó Paquita Suárez Coalla y que vien a ser, de dalguna manera, continuación de la qu’en 1995 publicara la mesma editorial col títulu Muyeres que cuenten y baxo la orientación, igualmente, de Suárez Coalla. Si naquella primer antoloxía de narradores asturianes s’atopaben únicamente siete nomes, na colección d’anguaño son diecisiete les escritores que se recueyen y qu’abarquen un arcu temporal que va dende Carmen Gómez Ojea (1945) a Laura Marcos (1982). Pel mediu, tán los nomes d’Aurora García Rivas, María Esther García López, Montserrat Garnacho Escayo, Cristina Muñiz Martín, Esther Prieto, Lourdes Álvarez, Consuelo Vega Díaz, Maite G. Iglesias, Berta Piñán, Pilar Arnaldo, Marta Mori, Paquita Suárez Coalla, Marisa López Diz, Paula Pulgar Alves y Iris Díaz Trancho.
La presentación contó cola presencia non solo de la coordinadora, Suárez Coalla, y de la responsable de Trabe, Esther Prieto, sinón tamién con delles de les autores incluíes nel llibru, lo que dio pie a un diálogu abiertu ente elles y col públicu sobre la presencia y visibilidá de les muyeres nel sistema lliterariu asturianu. El debate abriólu la propia Suárez Coalla al preguntase les razones poles que, más de venti años depués d’aquella primer antoloxía, la presencia de nomes de muyer nes llistes canóniques de la lliteratura y nos premios lliterarios yera tovía mui minoritaria si se comparaba cola de los homes, dalgo que, señaló, nun pasaba solo dientro de la lliteratura que s’escribe n’asturianu sinon tamién en castellanu.
Nesti sen, Consuelo Vega apuntó que, «anque les víes formales d’accesu al sistema lliterariu tán normalizaes, lo que nun ta normalizao ye l’accesu real a esti sistema», dalgo que, a xuiciu de l’autora de Más espeso que l’agua, débese «a pautes de comportamientu interiorizaes que cuesta superar». Pela so parte, Esther García preguntábase si los homes tan siquiera atienden pa lo que tienen que contar les muyeres y reivindicaba’l papel de la muyer como tresmisora de cultura, «anque esta cultura nun quedare escrita».
Más optimista mostróse Maite G. Iglesias, sobre manera al recordar la Selmana de les Lletres Asturianes d’anguaño, dedicada a les muyeres escritores, dalgo que, na so opinión, «dio pa ver la cantidá de muyeres moces que se tán sumando a la creación lliteraria n’asturianu». Esto fíxola asegurar que «la vía ta fecha» y que la xente mozo «ta incorporándose a ella», enantes de falar de la so esperiencia docente y espresar la satisfacción que-y da que moces a les qu’ella punxo clas agora tean non solo escribiendo, sinón tamién publicando n’asturianu. Nesta llinia manifestóse tamién Paula Pulgar, una de les escritores más nueves de l’antoloxía, al recordar cómo ún de los primeros llibros qu’ella lleera n’asturianu fuera Muyeres que cuenten y qu’agora ye ella una de les qu’escriben na antoloxía recién publicada.
Sobre la progresión que se dio ente la colección de rellatos de 1995 y la d’anguaño, Antón García –que yera editor de Trabe cuando se publicó Muyeres que cuenten– señaló qu’aquella yera una «antoloxía falsa», nel sentíu que, de les siete autores recoyíes nella, namás qu’una, María Teresa González, yera escritora de narrativa naquel momentu, mentes qu’a les demás pidióse-yos qu’escribieren un cuentu ex professo pal llibru. Hestories pa contales, al contrariu, «ye una antoloxía de verdá», recalcó García, «porque toles autores tienen ya una obra narrativa y la coordinadora escoyó ente lo qu’existe».
En cuantes al propiu volume, a caún de los rellatos precédelu’l retratu de l’autora, una biografía y una «narrática» –un testu breve onde caúna d’elles cuenta les razones que la lleven a escribir–. Al principiu del llibru, Paquita Suárez Coalla, como coordinadora, firma una introducción onde reflexona sobre la consideranza social de la lliteratura qu’escriben les muyeres y que termina col enfotu de qu’esti volume valga «pa sentir, más que pa entender, que les coses de muyeres, si ye que les hay, son coses de toes y de toos».
(d’El Summum, 28-07-2017)
Tierra alantre, la mesma fala 
Deixar ua Respuosta