El director xeneral de Política Llingüística y Normalización del Principáu, Fernando Padilla, presentó esti xueves n’Avilés la gala del X Premiu al Meyor Cantar, que se va celebrar nel Teatru Palacio Valdés el vienres día 29, a les 20.00 hores.
Padilla, que tuvo acompañáu pola conceyala de Cultura del Conceyu d’Avilés, Yolanda Alonso, y por Montserrat Machicado, miembru del xuráu, destacó l’afitamientu d’esti certame nel panorama musical asturianu. “Depués de diez ediciones, podemos dicir que yá se convirtió nun referente”, dixo.
El Gobiernu d’Asturies convoca’l Premiu al Meyor Cantar “pa consolidar, dar prestixu y arriquecer la creación musical n’asturianu y en gallego-asturianu”. L’intérprete o grupu ganador va recibir una escultura orixinal de l’artista María Jesús Rodríguez.
Amás, el Principáu va velar pola promoción y espardimientu del cantar nos medios de comunicación y nos eventos entamaos o promovidos por él, según apunten dende l’Executivu autonómicu en nota de prensa.
Los cuatro finalistes d’esta edición son los grupos Hoboken Band y Luis Núñez y los Folganzanes y los músicos Odón del Paganéu y Bras Rodrigo, que van actuar na gala pa que’l xuráu, formáu por especialistes en música y llingua asturiana, decida’l cantar ganador.
Mentes el concursu, que se va emitir na TPA, tamién va ufrir un conciertu Anabel Santiago, ganadora de la edición anterior col tema ‘La lloca’.
(d’Europa Press, 15-09-2017)
Tierra alantre, la mesma fala 
Deixar ua Respuosta