L’Europarllamentu de Bruxeles va acoyer, nel primer trimestre del 2018, una xornada pa falar de la realidá y les necesidaes actuales de la llingua asturiana. “Un finxu más na visualización y promoción del idioma nel contestu européu”, afirmó’l presidente de l’Academia de la Llingua, Xosé Antón González Riaño.
El mandatariu de la institución llingüística participó esti vienres nun alcuentru na sede de l’Academia cola europarllamentaria d’IX Ángela Vallina. Ellí alcordaron establecer mecanismos de collaboración que permitar promocionar la realidá del nuestru idioma dientro y fuera d’Asturies, “nun procesu de reivindicación de la oficialidá”, según señaló Vallina.
El primer compromisu foi realizar esta xornada en Bruxeles nA que se va tratar la situación, realidá y necesidaes del asturianu, aprovechando, amás, la existencia d’un intergrupu de llingües minoritaries. Ángela Vallina, que recordó que pa IX la llingua forma parte de les sos señes d’identidá, afirmó que hai un interés “creciente” dientro de lo que ye la Unión Europea y la Eurocámara “coles llingües minoritaries de los países”.
“Creo que ye’l momentu afayadizu de dar un tirón y una repercusión que salga acullá d’Asturies pa les nuestres reivindicaciones sobre la nuestra cultura y, sobremanera, sobre la nuestra llingua”, sentenció Vallina.
Per otru llau, Riaño esplicó que l’Academia ta teniendo xuntes colos distintos axentes sociales d’Asturies, grupos parllamentarios y sindicatos, “p’algamar el mayor de los consensos y apoyos na potenciación del asturianu”.
Nesi sentíu, comentó que’l contactu colos europarllamentarios, del que’l primeru foi con Ángela Vallina, “interesaba enforma” pa tratar maneres de collaborar pa “dar a conocer nel contestu européu la llingua asturiana”.
(d’Europa Press, 29-09-2017)
Tierra alantre, la mesma fala 
Deixar ua Respuosta