La Delegacion del Gobiernu n’Asturies deniega’l permisu pa la celebración de la I Carrera pola Oficialidá, que taba organizada pola Xunta pola Defensa de la Llingua Asturiana (XDLA) y que se diba celebrar esti sábadu 14 d’ochobre en Bimenes. Por eso, la XDLA señala que se ven “obligaos” a suspendela.
Al traviés d’una entrada na páxina de Facebook de la carrera, l’asociación cultural muestra la carta de la Xefatura Provincial de Tráficu n’Asturies onde s’afirma que la carrera coincide con otres dos pruebes deportives “dalgo que merma significativamente los servicios ordinarios de vixilancia y cometíos de l’Agrupación de Tráficu de la Guardia Civil”.
Coles mesmes, la Xefatura señala que nun disponen del personal necesario pa garantizar la seguridá na prueba. Amás, apunten que nun ta incluida dientro del calendariu de pruebes deportives del 2017 nel que participen Federaciones y clubes.
Según pudo saber Europa Press, el permisu taba solicitáu dende primeros de setiembre, pero la Xefatura nun unvió l’informe desfavorable a la Dirección Xeneral d’Interior del Gobiernu d’Asturies hasta esti martes 10 d’ochobre.
La situación, según anuncia la XDLA en Facebook, lleva a la organización a dar orde de devolución de les cuotes d’inscripción a “les decenes de persones inscrites”. Amás, señalen que tán analizando les sides que dende Delegación de Gobiernu ponen pa esta “prohibición” y estudiando acciones pa denunciar “lo que nos parez, de mano, una decisión arbitraria de la Delegación del Gobiernu n’Asturies”.
Otra manera, agradecen la intención de participar y l’interés de les persones que s’ufrieron pa collaborar cola organización de la carrera “y pidimos disculpes polos trestornos que vos cause esta cancelación”.
(d’Europa Press, 10-10-2017)
Tierra alantre, la mesma fala 
Deixar ua Respuosta