Xuan Santori Vázquez con «42.553: depués de Buchenwald»ye’l ganador de la XXIII edición del Premiu Máximo Fuertes Acevedo d’Ensayu n’asturianu, que con una dotación de 3.000 euros concede’l Gobiernu d’Asturies. A esti gallardón podíen presentase obres de tema, xéneru y estructura llibre que reunieren les característiques del xéneru ensayísticu entendíu na so amplitú.
El director xeneral de Planificación Llingüística y Normalización, Fernando Padilla Palicio, presidió la reunión del xuráu, que tuvo tamién integráu polos escritores y investigadores Luis Casteleiro Oliveros, María del Pilar Fernández González, Ana Vanesa Gutiérrez González y Elena de Lorenzo Álvarez.
Ente les obres presentaes, el xuráu decidió por mayoría conceder el Premiu a la titulada «42.553: depués de Buchenwald», que se presentó col seudónimu Waldemar, al reconocer «el xuegu de ficción y realidá consiguío al traviés de la xuntura d’imaxe, testimoniu y documentación y la dimensión internacional qu’adquier la obra», según destaca l’acta.
Xuan Santori Vázquez, doctor en Filoloxía, ye una de las voces más personales de la lliteratura asturiana. Ye autor de destacaos estudios sobre la lliteratura asturiana y el papel d’esta y los sos cultivadores nel desarrollu, normativización y normalización de la llingua asturiana con obres como «Milenta voces. Visiones del Surdimientu» o «El Surdimientu y la lliteratura asturiana: normalización y estandarización».
Como poeta diose a conocer col llibru «Zunes» en 1998, al que siguieron los poemarios «Les inconveniencies de la especie» en 2000, «Bis a bis» en 2004 y «Según cumple’l día» en 2015. En prosa publicó los volúmenes «La heredá» en 2006 y «La fábrica de lluz» en 2008. Algamó los premios de poesía Teodoro Cuesta de 1999 y Elvira Castañón de 2008, asina como’l premiu de la crítica d’Asturies nos años 2005 y 2008.
(de La Voz de Asturias, 02-11-2017)
Tierra alantre, la mesma fala 
Deixar ua Respuosta