El Conceyu de Siero, a traviés del Serviciu de Normalización Llingüística, presentó esti miércoles, con oxetu del Día Internacionald de la Llingua Materna, un material específicu n’asturianu pa trabayar nes dos escueles infantiles municipales de 0 a 3 años, El Carmín en La Pola y La Manzana en Llugones.
Al traviés d’una nota de prensa, el Conceyu de Siero recuerda que la celebración del Día Internacional de la Llingua Materna foi proclamáu pola UNESCO nel 2000 y celebrándose dende entós cada 21 de febreru pa recordar la importancia de protexer y favorecer la diversidá llingüística.
La iniciativa presentada ye una campaña que fomenta’l xuegu infantil oral pa conocer y rellacionar los nomes n’asturianu de los animales de la casería. El xuegu tien una alfombra onde apaecen los contornos de 9 animales colos nomes respectivos y 9 pieces cola imaxe real de los mesmos pa colocar nel so sitiu específicu.
Esta iniciativa empezó a facese l’añu pasáu nes escueles infantiles de 0 a 3 años d’Avilés y van sumándose a la mesma más conceyos d’Asturies pa enseñar nestes edaes tempranes el léxicu asturianu mediante’l xuegu, “y tresmitir y fomentar asina esti valiosu caudal cultural”.
Grau y Candamu
Tamién en Grau, na escuela Bernardo Gurdiel fíxose un actu a la hora del recréu onde se lleó una declaración que fixenon los propios escolinos sobre’l Día Internacional de la Llingua Materna y que se pudo sentir n’asturianu, castellanu, griegu, francés, inglés, rumanu, árabe y ucranianu.
En Candamu, la celebración foi na escuela Prieto Bances y consistió na presentación por parte del Técnicu del Serviciu de Normalización Llingüística, Miguel Rodríguez Monteavaro, y el Conceyal de Cultura, José Luis Suárez Arias, de ‘El llibru pa lo más pequeñín de la casa’.
Esti llibru que se publica agora en Candamu yá foi publicáu por otros conceyos como Grau, L.lena, Xixón, Cangas del Narcea y dellos más y ye un cuadernu pa que los padres puedan apuntar la evolución del fíu o fía nos sos primeros años de vida. Esti llibru va poder consiguise na Casa del Conceyu cuando los proxenitores inscriban nel padrón a los recién nacíos.
“Tolos actos d’esti Día Internacional de la Llingua Materna que se fixeron ente Grau ya Candamu son una muestra de cómo estos dos conceyos apuestan pola normalización social del asturianu como elementu de cohesión social ya nunca d’enfrentamientu”, señalaron al traviés de nota de prensa.
(d’Europa Press, 21-02-2018)
Deixar ua Respuosta