Los xuristes destaquen que la falta de desarrollu de la Llei d’Usu y Promoción del Asturianu o los problemes pa la so aplicación nel ámbitu de los Conceyos ta faciendo que la única solución “posible y lóxica” sía la declaración d’oficialidá de la llingua asturiana.
Asina lo destacó’l lletráu del Tribunal Constitucional, José Manuel Pérez Fernández, que participó esti llunes n’Uviéu nuna mesa redonda pa celebrar los 20 años de l’aprobación d’esta norma. Na mesa tamién participaron el Catedráticu de Derechu Alministrativu de la Universidá d’Uviéu, Leopoldo Tolivar Alas; y l’abogáu espertu en temes llingüístico-llegales, Nicolás Bartolomé Pérez.
Y ye que mesti mes de marzu de 2018, cúmplense 20 años de l’aprobación de la Llei 1/1998 d’usu y promoción del bable/asturianu, que nel so momentu presentó’l Partíu Asturianista y qu’apoyó’l Gobiernu asturianu, dirixíu nesos momentos pol ‘popular’ Sergio Marqués, qu’a metá de llexislatura, por diferencies cola dirección ‘popular’, abandonó’l so partíu pa fundar URAS.
Nesi sentíu, en declaraciones a Europa Press, Toliva Alas destacó que’l so momentu de tramitación foi “complicao”. “Yera un Gobiernu nuna minoria increible, tou un precedente n’Europa nel campu del derechu públicu”, indicó’l catedráticu, que señaló qu’a pesar d’eso sacó alantre lleis como esta, “que posiblmente güei nun sería posible”.
Sobre la situación actual de la Llei d’Usu, Tolivar Alas afirmó que tovía tien capacidá d’actuación “porque nun se desarrolló”. Asina, recordó que después de l’aprobación d’esta norma’l socialista Vicente Álvarez Areces ganó les elecciones por mayoría absoluta “y cambió la filosofía, porque la Llei prevé en dos ocasiones que se desarollé al traviés d’un reglamentu xeneral”, dalgo que, según indicó, nun se fixo.
Asina, a pesar de lo “llimitada” que ye la Llei, el catedráticu destacó que reconoz los derechos de los falantes énte l’alministración, “dalgo insólito que nunca se declaró inconstitucional”. Con too, señaló qu’en materies como la Educación la “palabra máxica” ye oficialidá. “Ye lo qu’establez el Tribunal Constitucional”, sentenció.
Per otru llau, José María Pérez indicó que la Llei d’Usu tien problemes na so aplicación, “porque munches veces el derechu a usar l’asturianu ta colisionando con problemes d’aplicación sobre too nel ámbitu local”.
Nesi sentíu, el lletráu del Tribunal Constitucional recordó les impugnaciones feches pol PP a les ordenances d’usu del asturianu en dalgunos Conceyos, “que nun faen más qu’aplicar lo que diz la Llei al ámbitu local”. Amás, mentó los “conocíos problemes” nel ámbitu educativu y la toponimia “que s’aprueba y nun s’aplica”.
Asina, esplicó que la Llei d’Usu pue entendese “en sentíu ampliu o reduccionista” y qu’esto últimu “va en contra de la mesma llei en dalgunos preceptos”. “Facelo asina fai que sían los Tribunales los que decidan la interpretación y l’aplicación de la llei, lo que tien un costu social que lleva a que la única solución posible y lóxica sía la declaración d’oficialidá”, dixo.
P’acabar, Nicolás Bartolomé dixo que nestos momentos, énte les impugaciones de les ordenances d’usu del asturianu nos Conceyos y el debate la oficialidá, hai dos posibles espectatives pa la Llei. “Afondar n’ella o reformar l’Estatutu d’Autonomía y qu’esta llei conviértase nuna norma dedicada a desarrollar la oficialidá del asturianu”, indicó.
Asina, esplició qu’una de les “carencies” d’esta norma ye’l so desarrollu normativu. “Por exemplu, fala de los Conceyos, pero ta dando problemes, y na Educación falta la oficialidá pa que nun existan llimitaciones llegales”, sentenció.
(d’Europa Press, 19-03-2018)
Tierra alantre, la mesma fala 
Deixar ua Respuosta