El director xeneral de Planificación Llingüística y Normalización, Fernando Padilla, afirmó que nesta llexislatura’l Gobiernu d’Asturies va intentar desarrollar al máximu la Llei d’Usu, “lo que nun quita pa que n’otres circunstancies polítiques, como parez que va haber, haya otru marcu llegal pal asturianu”.
En declaraciones a Europa Press, el director xeneral posicionóse sobre’l desarrollu de la Llei d’Usu del Asturianu depués d’asistir, xunto al conseyeru d’Educación y Cultura, Genaro Alonso, a una mesa redonda cola que’l Principáu conmemoró los 20 años de l’aprobación d’esta norma.
Al actu tamién acudieron otros dirixentes como’l conseyeru de Cultura d’Uviéu, Roberto Sánchez Ramos; la conceyala d’Educación y Cultura d’Avilés, Yolanda Alonso, el portavoz de Podemos Asturies, Emilio León, o’l rector de la Universidá d’Uviéu, Santiago García Granda.
Nesi marcu, Padilla reconoció que la Llei d’Usu “desarrollóse poco”, pero que dende l’Executivu tán intentando sacar alantre iniciatives que parten d’esta norma, como’l decretu de los niveles de conocimientu del asturianu adaptáu al marcu européu, la posibilidá de que s’ufierte l’asignatura n’Educación Infantil, desarrollar la toponimia o reconocer l’asturianu como méritu nel accesu a l’Alministración.
“Pue desarrollase más –la Llei d’Usu– a nivel institucional y alministrativu, lo que nun quita pa que n’otres circunstancies polítiques, como parez que va haber, haya otru marcu llegal pal asturianu”, dixo’l director xeneral nuna referencia clara al cambiu d’actitú de la FSA hacia la oficialidá.
Con too, quixo dexar clara que pel momentu, nesta llexislatura, dende’l Gobiernu van siguir trabayando con esti marcu llegal “y vamos intentar desarrollala al máximu”
Especialidá d’asturianu
Per otru llau, Padilla afirmó que tovía nun pudiera falar con conseyeru Genaro Alonso sobre’l conceyu que tuvo esti llunes en Madrid col ministru d’Educación, Cultura y Deporte y portavoz del Gobiernu, Íñigo Méndez de Vigo. “El conseyeru vieno directamente dende Madrid hasta esti actu y nun tengo conocimientu de lo que falaron”, indicó.
Por eso, tovía nun sabe si hubo dalgún avance nel reconocimientu de la especialidá pal profesoráu d’asturianu, dalgo qu’en Madrid refuguen al nun ser esti idioma llingua oficial.
Asina, el director xeneral esplicó que la situación actual supón un “escarniu” hacia’l profesoráu d’asturianu. “Nun sé ta reconociendo’l trabayu profesional que tán faciendo, munchos d’ellos dende hai 20 años”, sentenció.
(d’Europa Press, 19-03-2018)
Tierra alantre, la mesma fala 
Deixar ua Respuosta