El Conceyu de Mieres aprobó, la selmana pasada, de manera definitiva la Ordenanza municipal d’usu de la llingua asturiana nel conceyu, que tien como oxetivu facilitar l’usu del asturianu nes relaciones de l’alministración y garantizar el derechu de tola ciudadanía a espresase llibremente n’asturianu o en castellanu ensin ser discriminada por mor del idioma, protexendo y afalando l’usu del asturianu en tolos ámbitos.
Ente los artículos incluíos na ordenanza, y según recordó’l conceyu, plantéase que l’asturianu ye, col castellanu, la llingua empleada pol conceyu de Mieres, l’alministración local y les corporaciones públiques que d’ella dependan y que tolos ciudadanos tienen derechu a emplear l’asturianu y a espresase nél de palabra y per escritu, de la mesma forma qu’en castellanu, dando por válidu a tolos efectos xurídicos l’usu de la llingua asturiana nes comunicaciones orales o escrites de la ciudadanía cola alministración local.
L’asturianu nes ordenances, reglamentos y bandos, la imaxe institucional del Conceyu amás del usu del asturianu nel ámbitu internu de l’alministración y nes relaciones ente alministraciones son otres de les cuestiones incluíes nesta ordenanza qu’entra yá a valir y que fai alusión tamién a la toponimia, al usu del asturianu polos cargos públicos o a la so promoción na vida social y cultural, ente otres temes.
(d’Europa Press, 26-03-2018)
Tierra alantre, la mesma fala 
Deixar ua Respuosta