Esti vienres 4 de mayu a les 20.30 hores, el Teatru Campoamor d’Uviéu va avoyer l’actu principal del XXXIX Día de les Lletres Asturianes. Trátase de la Xunta Estraordinaria de l’Academia de la Llingua Asturiana, onde’l profesor de la Universidá d’Uviéu Xosé Antón González Riaño va dar el so primer discursu anual como presidente de la institución depués de suceder a la catedrática de filoloxía románica Ana Cano.
Amás, nesta Xunta Estraordinaria, l’Academia va dar acoyida a les dos académiques correspondientes nueves. Son Margarita Fernández Mier y Isabel Hevia Artime, profesores de la Universidá d’Uviéu.
Margarita Fernández Mier (Uviéu, 1966) ye doctora n’Historia y Profesora Titular del Departamentu d’Historia de la Universidá d’Uviéu, mentes qu’Isabel Hevia Artime (Antromero, 1982) ye doctora en Pedagoxía y profesora del Departamentu de Ciencies de la Educación de la Universidá d’Uviéu, del que ye, amás, Secretaria.
L’actu, presentáu por Sonia Avellaneda y Próspero Morán, va cuntar con un empiezu musical del gaiteru Fabián Fernández y va tener como pieslle l’actuación del cantautor asturianu Nacho Vegas que, xunto col coru Al altu la lleva’, va facer un percorríu pol so reportoriu de música asturiana y n’asturianu.
(d’Europa Press, 03-05-2018)
Tierra alantre, la mesma fala 
Deixar ua Respuosta