L’asociación Reciella-Families pol Asturianu presenta’l vídeo de ‘Espoxiga’, un títulu que coincide col lema del VI Día de la Reciella y que ta compuestu por Pop Piquiñín –la versión n’asturianu del exitosu grupu infantil asturianu, Petit Pop–.
El Día de la Reciella ye un eventu festivu de tipu familiar organizáu pola asociación Reciella, nel que durante un día completu, dende pela mañana hasta pela nueche, sucédense actividaes, talleres, conciertos y exhibiciones deportives que tienen como nexu l’usu del asturianu como llingua vehicular, indica l’asociación al traviés de nota de prensa.
Esti eventu gratuitu y abiertu qu’axunta a miles de personses lleva celebrándose dende l’añu 2012 en Xixón, nel Muséu del Pueblu d’Asturies el primer domingu del mes d’ochobre –nesta ocasión el 7 d’ochobre– y dende hai 3 años la so promoción inclúi la publicación nos meses previos un cantar específicu realizáu por una banda o artista asturianu.
Nel añu 2016 el cantar del Día de la Reciella foi ¡Entaína! de Skama la Rede y en 2017 ‘N’asturianu, sumes’, de David Varela. Nesti 2018, el cantar ye ‘Espoxiga’.
El vídeo, que ya ta disponible na rede, ye ta basáu nuna idea, y realizáu y dirixíu por Pablo Quiroga Prendes, cola edición de color, efectos y dellos visuales de Juan Tizón y la so grabación fíxose nel Xardín Botánicu Atlánticu de Xixón, participando nella Mar Álvarez de Pop Piquiñín y familes de l’asociación Reciella.
La lletra, escrita como nes ediciones anteriores por David Guardado, tresmite un mensaxe positivu que fala de la necesidá que tienen les llingües, como les persones o los animales de ser cuidaes y queríes pa tener vitalidá, y nel casu de los idiomes, la importancia de falales en familia p’asegurar la so pervivencia nes siguientes xeneraciones.
(d’Europa Press, 25-07-2018)
Tierra alantre, la mesma fala 
Deixar ua Respuosta