“La xente avérase muncho al asturianu pola música”

XAUME MARTÍNEZ

Anque la xente lu conoz principalmente pola curdión, cola que percuerre de magar munchos años los escenarios d’Asturies, ello ye que David Varela (Xixón, 1975) fai munches más coses: toca un bon garrapiellu d’instrumentos; ye mayestru de música en Tinéu, Nava, Cangas del Narcea, Llaviana y Xixón; foi componente de bandes de gaites y grupos folk como Lliberdón, La Bandina o, anguaño, La Bonturné, y tien acompañao a artistes como Anabel Santiago o Marisa Valle Roso. Falemos con elli d’educación musical, del papel de la llingua na enseñanza y de tocar música pa nenos.

Esti día falábemos de la importancia de la tresmisión xeneracional pal caltenimientu de l’asturianu. Nel so casu, la familia foi decisiva nel empiezu, ¿non?
Yo en casa tengo un hermanu gaiteru, asina que crecí cola gaita. Entamé col tambor y hasta güei. Los primeros años nun me dediqué profesionalmente a la música (personalmente, siempres) pero anguaño ye la mio actividá profesional tamién.

¿Y la so rellación cola música determinó’l so averamientu al asturianu?
Nací en Xixón, prácticamente falando en playu. La llinia de llegada que tuvi col asturianu foi la música, por tar metíu en xéneros tradicionales. En mio casa la mio fía ye falante d’asturianu, igual que ta venceyada a la música. Ye prestoso ver que la mio fía caltién conversaciones entemeciendo castellán ya inglés cola ma, y asturianu y francés comigo.

Cuido que, tamién, pola mor del so trabayu n’institutos y escueles de música habrá munchos críos qu’entamen a reflexonar sobre la llingua y a naturalizar la rellación con ella.
La xente avérase muncho al asturianu por cuestiones musicales. Onde trabayo caltengo l’usu del asturianu con normalidá, con toles variantes. Pa min ye importante facelo nes escueles municipales, y los neños tán encantaos: la posibilidá de falar ensin torgues ye mui práctica. La oficialidá ye importante pa normalizar l’asturianu y pa medrar culturalmente, nesti casu al traviés de la música.

Y amás de poner escuela, tamién toca música n’asturianu pa nenos de colexos de tol país nel marcu del proxectu “Axenda didáctica”?
Agora toi centráu musicalmente na “Bonturné”, un cuartetu de músicos qu’ufierta un timbre bien particular. Con ellos y coles obres teatrales d’Olga Cuervo trabayo n’Axenda. L’Axenda Didáctica ye una de les actividaes educatives más positives que yo conocí, partiendo de la normalidá del asturianu y gallegu-asturianu, y faciendo por avera-yos a los escolinos la potente diversidá cultural que hai n’Asturies na música, nel teatru, na lliteratura y nes artes plástiques.

¿Y a qué atribuye l’éxitu d’una iniciativa como l’Axenda?
Medrar culturalmente ye espoxigar en tolos sentíos, dende la fala a cualquier aspectu cultural. Les actividaes nuestres son mui pa trabayar colos mayestros d’asturianu nes escueles. Pa min ye tan importante curiar el padremuñu llingüísticu como curiar el Prerrománicu o protexer los Picos d’Europa, o incluso más. Nos colexos presta enforma’l fechu de que’l trabayu que tu faes tea desendolcáu allá: cuando llegues, los nenos trabayanon el vocabulariu, entienden perfectamente lo que tas faciendo?

Y dende l’otru llau, vusté nun solo toca música pa nenos, sinón que tamién compunxo dellos cantares nel proxectu de música infantil n’asturianu Bestiariu.
A los neños lláma-yos l’atención qu’un músicu conocíu por dellos cantares o por salir na tele fale como ellos y los sos amigos. Esa normalización failos escaecer torgues y complexos. Esto llévame a escribir temes pal públicu infantil, nes tres ediciones de Bestiariu, collaborando con Pop Piquiñín?

(de La Nueva España, 10-10-2018)