Los servicios xurídicos del Conceyu d’Avilés afirmaron que, al nun recoyer l’Estatutu d’Autonomía la oficialidá del asturianu, el Plenu municipal nun pue aprobar unes ordenances pa regular l’usu y la promoción d’esta llingua nel conceyu.
Asina se recueye nun informe técnicu de los servicios xurídicos municipales al que tuvo accesu Europa Press y que señala que nestos momentos l’Estatutu d’Autonomía nun dispón que’l “bable” tenga’l calter de llingua oficial n’Asturies xunto col castellanu.
Por eso, l’informe, depués de recordar una sentencia del Tribunal Superior de Xusticia d’Asturies qu’establez que los conceyos nun tienen potestá pa “declarar la oficialidá” del asturianu nel so territoriu, diz que’l Conceyu d’Avilés nun tien competencies pa “declarar l’usu del bable dientro o acullá de les llendes del conceyu”.
Asina, señala que de les ordenances podría deducise “un réxime de cooficialidá llingüística ente’l castellanu y la llingua asturiana”, polo que los servicios xurídicos informaron de forma “desfavorable” al proyectu d’ordenances que pretendía regular l’usu y promoción de la llingua asturiana dientro del Conceyu.
Nestos momentos, conceyos como L.lena, Grau, Mieres, Xixón, Bimenes, Llaviana o Cangas disponen d’una ordenanza aprobada nel so plenu que desarrolla l’artículu ocho de la Llei d’Usu y Promoción del Asturianu, qu’establez que los conceyos asturianos van poder adoptar les midíes afayadices “p’asegurar la efectividá del exerciciu de los derechos llingüísticos qu’esta Llei otorga a los ciudadanos residentes n’Asturies”.
(d’Europa Press, 02-11-2018)
Tierra alantre, la mesma fala 
Deixar ua Respuosta