La banda decana del rock n’asturianu, Dixebra, va publicar d’equí a pocos díes un discu nuevu en directo. Trátase de ‘Uviéu 17-9-2017’, onde s’inclúi la grabación del conciertu que la banda avilesina ufrió na Plaza La Catedral d’Uviéu en setiembre del 2017.
Trátase d’espectáculu espresamente entamáu pal Festival Intercélticu de Lorient que Dixebra repitió na capital asturiana y nél collaboren dellos de los músicos más reconocíos del panorama musical asturianu.
Jose Tejedor (gaita), Javi Tejedor (curdión), Rubén Bada (buzuqui y violín), Ángel Ruiz (banjo) y Toño Gómez (trombón) y l’aportación especial de Maxi Compán (voz) de Fe de Ratas son los convidaos que se van poder sentir nesti trabayu nuevu .
El discu inclúi 19 cantares y va ser una edición limitada nun formatu especial, con un llibretu con semeyes d’aquella nueche, y que yá se pue acutar en musicasturiana.com, onde les 50 primeres unidaes van dir firmaes pola banda. Amás, toles persones qu’acuten esti CD van entrar nel sortéu d’una botella de sidra ‘dixebriega’ dedicada pol grupu.
“El soníu resultante ye un amiestu de rock contundente con folk y música asturiana. Amás va dir con un formatu y soporte novedosu mui chulu. Nunos díes vamos tenelu per equí…”, indicó la banda nun apunte en Facebook recoyíu per Europa Press.
(d’Europa Press, 08-11-2018)
Tierra alantre, la mesma fala 
Deixar ua Respuosta