Estos son los pasos para convertir l’asturianu en llingua oficial

Los miles de persones que se manifestaron a favor de so nesti añu y el sofitu de dalgunos partíos d’izquierda faen pensar que la cooficialidá del asturianu ta más cerca que nunca. Pero tovía nun ta too ganao y la so meta queda entá bien lloñe. Otros partíos del parllamentu autonómicu ficieron bandera de la so oposición a la oficialidá del asturianu y, amás, les oportunidaes perdíes nel pasáu conviden a ser previsores. Los que persiguen la reconocencia del asturianu como llingua oficial, de la que gocien les llingües d’otres comunidaes dende va años, entovía tendrán que lluchar por ello. ¿Cómo algamalo? Pa llegar a esi oxetivu, cuenta Inaciu Galán, presidente d’Iniciativa pol Asturianu, queden entovía dalgunos pasos que dar.

1. Consensu

La organización que dirixe trabaya pola normalización del asturianu y pola reconocencia de los derechos llingüísticos y entiende que la oficialidá nun va dexar a naide al marxe: «tien de ser necesariamente una cuestión de consensu, como lo foi en toles comunidaes con llingua propia y como lo foi na Constitución, que diz a les clares que les llingües propies han ser oficiales». Pa ello, diz Galán, hai que sumar a tolos partíos políticos posibles p’algamar el cambéu nel Estatutu d’Autonomía. Un oxetivu pal que tien que tratase la xera complicada de dexar de llau l’electoralismu.

2. Frenar los ataques

«Sicasí, agora mesmo, nesta llexislatura paez evidente que nun ye posible sacar alantre esta reforma», señala Inaciu Galán, qu’apuesta por «un alcuerdu mínimu ente les formaciones que van llevar la oficialidá nel programa». Y tamién por «amosar l’aisllamientu, la falta de capacidá pa llegar a alcuerdos y la radicalidá estrema del PP de Cherines (Mercedes Fernández, presidenta de la formación que con más afán s’opón anguaño a la oficialidá anque’l so grupu la sofitó nel pasáu) nesta cuestión». Pal presidente d’Iniciativa pol Asturianu ye vital que los demás partíos nun dexen «que’l PP siga introduciendo idees contraries al asturianu na sociedá ensin responder de forma xunitaria».

3. Protexer el patrimoniu y la identidá

Ye imposible abordar la cultura asturiana ensin considerar l’asturianu una parte fundamental d’ella. Poro, considera Inaciu Galán, hai que «protexer un elementu clave na cultura asturiana y na identidá de los asturianos y asturianes, y la de drechos civiles, reconocer la plena igualdá xurídica al usu per parte de los ciudadanos y de l’alministración con ellos».

4. Encontase n’instituciones internacionales

El presidente d’Iniciativa pol Asturianu destaca que nos últimos años hubo delles instituciones internacionales qu’emitieron informes pa llamar l’atención de los gobiernos nacional y autonómicu al respeutive del asturianu como, por exemplu, la UNESCO o’l Conseyu d’Europa.

5. Preparase pa un procesu llargu

«Hai qu’esplicar a la xente qu’esti ye un procesu llargu y enllenu de dificultaes», defende la máxima autoridá d’Iniciativa pol Asturianu qu’apunta los trámites estremaos qu’habrá superar l’asturianu pa llegar al momentu de la so aprobación pol Congresu.

6. Acelerar los trámites

Esto último nun implica que los que tán a favor de la oficialidá tengan que quedar de brazos cruzaos: «tamos falando d’un camín que tenemos de facer por acelerar, pero teniendo claro que tien unos pasos. Nun podemos dar la falsa sensación de qu’esto va ser fácil nin rápido, porque necesitamos la xente movilizao y trabayando».

(d’Atlántica XXII, 27-11-2018)