El conseyeru d’Educación, Genaro Alonso, tresmitió a la ministra d’Educación, Isabel Celáa, la reivindicación de la especialidá docente de Llingua Asturiana y Lliteratura, dalgo qu’esixe un cambiu nos reales decretos d’especialidaes, que son competencia del Ministeriu.
Nellos, tendría qu’establecese que se pue aprobar la especialidá docente pa llingües qu’anque nun son oficiales tienen protección llegal y una política llingüística desarrollada pola comunidá autónoma, como ye’l casu de la llingua asturiana.
Esti foi ún de los puntos que trataron esti miércoles en Madrid Alonso y Celáa nel alcuentru que mantuvieron y onde’l conseyeru demandó un apoyu “mayor” pa la escuela rural y pa la estensión del primer ciclu d’infantil, amás de la puesta en marcha de midíes p’afalar la gratuidá de los llibros de testos.
Asina lo indicó’l Principáu al traviés de nota de prensa, onde nun se menta’l tema de la especialidá docente ente los asuntos trataos. Sicasí, según fontes de la Conseyería d’Educación y Cultura consultaes por Europa Press, la situación del asturianu nes escueles sí que tuvo ente les problemátiques de les que falaron los dos mandatarios.
Les mesmes fontes señalen que, pel momentu, ye ceo pa falar d’avances nel reconocimientu por Madrid del profesoráu de llingua asturiana, porque esti foi’l primer contactu de la ministra col tema y nel qu’esperen afondar n’alcuentros próximos.
Trátase d’una midida que’l conseyeru de Cultura asturianu, Genaro Alonso, llevaba meses negociando col ministru d’Educación anterior, el ‘popular’ Íñigo Méndez de Vigo, ensin que saliera alantre pola negativa de Madrid a crear la especialidá pa una llingua que nun ye oficial.
El mesmo Alonso llegó a criticar n’ochobre a PP asturianu porque “fixeron lo imposible pa facer imposible esi reconocimientu”. Nesi sentíu, llegó a dicir na Xunta Xeneral que diba siguir pidiéndolo con “firmeza” y “esfotu” énte la ministra actual, Isabel Celáa, que ta nun gobiernu socialista. “Naide del PSOE asturianu va llamar al Ministeriu pa entorpecer o torgalo”, dixo.
La especialidá
La creación de la especialidá docente ye una midida que los principales sindicatos educativos asturianos –CCOO, UXT, Suatea y CSI– vienen reclamando, al afirmar que la so falta supón que los más de 400 profesores qu’imparten asturianu nun puen presentase a oposiciones, tener una plaza fixa o optar a un concursu de tresllaos.
Nel ámbitu políticu, tolos partíos asturianos apoyen esta midida o, polo menos, lleváronla en dalgún momentu nel so programa. Mesmamente, nel 2009, el PP foi’l que presentó na Xunta Xeneral una proposición non de llei pa la creación de la especialidá docente d’asturianu.
El Parllamentu asturianu aprobó nos últimos años delles resoluciones pa que dende Madrid punxeren en marcha esta midida, anque’l PP suel votar en contra. Nel 2014, l’apoyu a la creación de la especialidá sumó a PSOE, IX, Foru Asturies y UPyD, daquella con un diputáu nel Parllamentu asturianu, Ignacio Prendes, güei portavoz de Ciudadanos n’Asturies y diputáu en Madrid.
Al marxe de les negociaciones nueves que se realicen dende’l Principáu col Gobiernu de Pedro Sánchez, espérase que la especialidá d’asturianu llegue al Congresu nos meses próximos. Y ye qu’Unidos Podemos presentó en mayu nel Congresu una Proposición Non de Llei (PNL) pa la so creación y la Federación Estatal d’Enseñanza de CCOO mostró la so intención d’aconceyar col Ministeriu pa reivindicar la so creación.
Nesi sentíu, dende Asturies espérase una sensibilidá mayor de la ministra actual, Isabel Celáa, porque foi conseyera d’Educación nel País Vascu, lo que la convierte nuna conocedora de los problemes del enseñu d’una llingua minoritaria.
(d’Europa Press, 16-01-2019)
Tierra alantre, la mesma fala 
Deixar ua Respuosta