L’Academia de la Llingua Asturiana (ALLA) quier que la entidá Plataforma contra la Cooficialidad se retracte llegalmente de les “descalificaciones graves” contra la institución, al acusalos, ente otros, de ser un “sindicatu políticu” y asemeyase a la “dictadura cubana”.
En declaraciones a Europa Press, el secretariu de l’ALLA, Xosé Ramón Iglesias Cueva, esplicó que la Xunta de la institución dio poderes al so presidente, Xosé Antón González Riaño, pa esixir llegalmente a la Plataforma rectificar lo que consideren “descalificaciones graves”.
Los fechos pasaron en xineru, cuando la Plataforma comparó al traviés d’un comunicáu a l’Academia cola “dictadura cubana”, acusólos de ser una “entidá nacionalista” y el xerme d’un “proyectu totalitariu” p’Asturies. Too eso depués de que’l presidente del PP, Pablo Casado, unviara una carta a la institución pa mostrar los sos respetos hacia la llingua asturiana, dalgo que nun prestó a la Plataforma.
Por eso, agora l’Academia quier qu’esa entidá, “que nun sabemos quien ye nin a quien representen”, se retracte d’estes palabres al entender que nun se trata d’una opinión. “Pue opinase sobre la oficialidá, a favor en contra, o sobre’l modelu a desarrollar, pero lo que dixeron nun son opiniones personales, son descalificaciones a una institución pública creada pol Principáu”, afirmó Iglesias Cueva.
Pa ello, va facese un actu de conciliación a finales d’esti mes nel Xulgáu de Primera Instancia númberu 4 d’Uviéu. Dende l’Academia anuncien que si la Plataforma nun se detracta d’estes palabres van dar “un pasu más”.
Con too, dende la Plataforma parez que nun van dar marcha atrás y esti llunes al traviés d’un comunicáu acusaron a l’Academia d’intentar “acallar les crítiques” contra’l “so llabor útil al nacionalismu asturianu”. Nesi sentíu, lleguen a falar de que la “demanda” supón un “intentu d’amordazar a la prensa y a la sociedá civil”.
(d’Europa Press, 04-03-2019)
Tierra alantre, la mesma fala 
Deixar ua Respuosta