El Boletín Oficial del Principáu d’Asturies (BOPA) d’esti xueves 21 de marzu publica los decretos polos que se determina la toponimia oficial de los conceyos d’Uviéu, Onís y Cuaña, qu’a partir de güei pasen a ser los oficiales y que nel casu de la capital asturiana recueye que va ser oficial la denominación tradicional ‘Uviéu’ xunto la castellana ‘Oviedo’.
Foi n’abril del 2018 cuando’l Plenu del Conceyu d’Uviéu, colos votos a favor del PSOE, IX y Somos, y en contra del PP y de Ciudadanos, aprobó la toponimia del conceyu. Un decretu que’l miércoles 14 de marzu pasáu aprobó definitivamente’l Conseyu de Gobiernu.
Na actualidá, 64 conceyos tienen yá aprobada la toponimia tradicional. Amás, los espedientes de Cabrales, Llanera, Castropol y Somiedu tán yá mui avanzaos, y en distintes fases tán los de Cuideiru, Ayande, Caravia, Ibias, El Valle Baju de Peñamellera, Salas, Navia, Pravia y Muros.
Uviéu
El topónimu Uviéu ta recoyíu pela primer vez de forma escrita en 1852, na pluma de Marcelino Flores de Prado. Otra manera, Apolinar Rato y Hevia, bisgüelu de Rodrigo Rato, tamién usó esta forma nuna carta unviada’l presidente de la Real Academia Española na que solicitó la introducción de palabres asturianes nel diccionariu español.
La mesma forma ye la qu’esti autor usa nel ‘Vocabulario de las palabras y frases bables’, de 1891. Per otru llau, tamién se recueye’l usu d’Uviéu nel periódicu local ‘El carbayón’ en 1897.
Amás, el cronista oficial d’Asturies, Julio Somoza, dedicó’l so llibru ‘Cosiquines de la mió quintana’, publicáu en 1884, al ‘Firme d’Uviéu’. Ye dicir, al rector de la Universidá d’Uviéu, Fermín Canella, máxima autoridá cultural d’Asturies n’aquel momentu.
Mesmamente, ‘Uviéu’ aparez n’obres lliteraries a lo llargu de tol sieglu XX, como en ‘L’Alborá de les Malvises’, de Constantino Cabal, publicada en 1944 y una de les obres más importantes de la historia de les lletres asturianes.
Per otru llau, nel llibru ‘Refanero asturiano’, publicáu pola Diputación d’Uviéu y el RIDEA en 1962 recuéyese’l dichu ‘Xente d’Uviéu tambor y gaita’.
P’acabar, en 2006 y 2007, el Conceyu d’Uviéu entamó’l ‘Premiu Uviéu de rellatos curtios, teatru y poesía en llingua asturiana’, un concursu lliterariu fechu en collaboración cola Academia de la Llingua Asturiana. Na so vida curtia, el premiu foi’l meyor dotáu económicamente de tolos que se convocaben anualmente en llingua asturiana
ANEXU 1: Decreto 14/2019, de 13 de marzo, por el que se determinan los topónimos oficiales del Concejo de Oviedo.
ANEXU 2: Decreto 15/2019, de 13 de marzo, por el que se determinan los topónimos oficiales del Concejo de Onís.
(d’Europa Press, 21-03-2019)
Tierra alantre, la mesma fala 
Deixar ua Respuosta