El Serviciu de Normalización Llingüística de Corvera pon en marcha’l taller ‘Una entruga pa cada historia’, que busca introducir na historia d’Asturies a les persones interesaes.
Según señalen dende’l Conceyu, el taller tien un planteamientu “abiertu y rigorosu al empar”, col que s’acerquen a cuestiones como’l Principáu d’Asturies, la cultura na Edá Moderna asturiana, les condiciones de vida del campesináu, el papel de la Ilesia, la Xunta Xeneral o la influencia de fechos históricos esternos na realidá asturiana.
Esti taller va impartilu’l técnicu responsable del Serviciu de Normalización Llingüística de Corvera, Rafael Rodríguez Valdés, que ye Llicenciáu n’Historia pola Universidá d’Uviéu y Postgráu n’Archivística pola UNED, amás de ser autor de distintes publicaciones vinculaes cola historia d’Asturies. Amás, va contase cola participación de trés historiadores especialistes na dómina moderna que van ufrir charles temátiques demientres el taller.
El taller, de calter gratuitu y con una duración de dieciséis hores, va desarrollase en sesiones de dos hores tolos miércoles, n’horariu de 18.00 a 20.00 hores, del 17 d’abril al 12 de xunu. Les sesiones del cursu van facese nel Aula 2 del Centru Sociocultural de Les Vegues.
(d’Europa Press, 09-04-2019)
Deixar ua Respuosta