Iván Llera: «Nesta llexislatura qu’entama hai una clara mayoría qu’apuesta pola oficialidá»

ARA IGLESIAS

El periodista Iván Llera toma’l relevu d’Inaciu Galán, tamién periodista, al frente d’Iniciativa pol Asturianu.

¿Cuálos son los sos primeros oxetivos?
Lo primero, caltener el ritmu de trabayu y siguir medrando como organización. Queremos tar más presentes nos conceyos. Lo más inmediato, rematar colos preparativos del estand na Feria de Muestres de Xixón, onde por tercer añu consecutivu va haber un espaciu acutáu pal asturianu.

¿Cuála cree que foi la mayor aportación d’Iniciativa al impulsu de la llingua asturiana?
Bono, creo que’l trabayu d’estos años contribuyó a una meyor imaxe del movimientu de vindicación llingüística. Ye dalgo mui importante. Fuimos quien a conectar con xente mui distinto. Incluso xente que nun ta d’alcuerdu con nós valora’l nuesu trabayu. Esi ye’l camín.

¿Cuála foi la mayor meyora del asturianu nestos años?
Diéronse pasos alantre. Parez una cosa menor, pero a mi préstame destacar la visibilización nes redes sociales del asturianu y de los problemes de discriminación que carecen los asturfaltantes. Amás, hubo esperiencies mui interesantes como’l programa pilotu pa impartir dalgunes asignatures dafechu n’asturianu y que ta dando mui bonos resultaos. Más recién, l’aprobación del decretu qu’asitia l’asturianu nel marcu llingüísticu européu y que va permitir realizar esámenes oficiales. Y hai que destacar l’enfotu puestu nos caberos cuatro años por dá-y un emburrión al procesu d’oficialización de la toponimia nos conceyos onde taba tovía pendiente.

¿En qué se reculó o enllancó?
Nun creo que seya tanto una cosa de pasos atrás. Tolo que nun seya avanzar ye un paso atrás pal asturianu.

¿Cumplen les instituciones cola Llei d’Usu?
Por desgracia, non. Falta compromisu a nivel políticu. Por eso, ente otres coses la Llei d’Usu ye un marcu insuficiente pa garantizar los derechos de los falantes. La falta d’oficialidá llimita muncho’l trabayu. Ya lo vimos cola ordenanza d’usu del asturianu en Noreña qu’anuló la Delegación del Gobiernu.

¿Escúchense agora menos voces antiasturianistes?
La percepción del asturianismu meyoró munchu nos caberos años. Les redes sociales faen ruíu, pero nun son la realidá. Si dalgo caracteriza al movimientu ye ser tresversal. Y eso ye lo más arriquecedor. Na nuesa organización hai persones de toles sensibilidaes. Ye una de les esencies d’Iniciativa pol Asturianu.

¿Qué tien d’ameyorar nel sistema educativu respectu al asturianu?
Pa entamar, la situación del profesoráu. L’asturianu lleva tres décades nes aules y los mayestros tan nuna situación precaria. Nun puede entendese que Principáu y Ministeriu sigan echando balones fuera cola especialidá docente. Hai que sacalo alantre. Esa situación d’interinidá perxudica a los alumnos.

¿Cree que ta asumida pola sociedá la necesidá de la normalización del asturianu?
Totalmente. Y ehí tan los casos d’empreses como MC Donald’s, Super Bock y Netflix, grandes multinacionales qu’ensin ser d’aquí entendieron que l’asturianu ye dalgo que nos identifica y nos fai sentir arguyosos.

¿Socialmente ye’l momentu de la oficialidá?
La sociedá asturiana lleva tiempu preparada pa la oficialidá. Ye una realidá que yá vienen amosando los estudios sociollingüísticos del profesor Llera Ramos a lo llargo de los años.

¿Y políticamente?
Políticamente tamos nun momentu únicu. Nesta llexislatura qu’entama hai una clara mayoría na Xunta Xeneral qu’apuesta pola oficialidá. Nunca na hestoria hubo tanto diputaos con una posición tan nidia. Tócanos trabayar pa reforzar esi sofitu y enanchar el consensu al rodiu de la oficialidá. Ye un derechu constitucional y Asturies nun puede ser menos que’l restu de comunidaes con llingua propia.

¿Qué ye lo primero que-y van pidir al nuevu Gobiernu que salga de la Xunta Xeneral?
Nós vamos siguir como hasta agora: cola mano tendida pa trabayar y siguir dando pasos alantre na normalización del asturianu y el gallego asturianu. Nesti sen, el Gobiernu y los grupos políticos con representación na Xunta Xeneral van contar siempres cola nuestra colaboración. Tamos a la so disposición.

En casu de nun llograr la oficialidá, ¿qué cuestiones cree irrenunciables pa siguir avanzando?
La oficialidá ye un oxetivu irrenunciable, pero nun puede bloqueanos. De toes maneres, soi optimista al respective. Toca trabayar más que nunca.

(de La Voz de Asturias, 02-07-2019)