Xaime Martínez foi gallardonáu esti xueves col Premiu Nacional de Poesía Moza ‘Miguel Hernández’ 2019, una “sorpresa absoluta” pal “llibru más arriesgáu” del autor mozu, según señaló en conociendo la noticia.
L’autor llamentó en declaraciones a Europa Press que nun llograría esti gallardón si’l llibru pol que foi premiáu, ‘Cuerpos perdidos en las morgues’, tuviera escritu n’asturianu. “Ye una pena que nun se pueda tener la mesma reconocencia n’asturianu qu’en castellanu”, indicó.
“Esti premiu de dalguna manera confirma que ye posible escribir una poesía arriesgáu formalmente y llegar a dalguna xente”, afirmó’l escritor mozu, al qu’hasta agora namás-y surdieron “idees absurdes” sobre lo que facer cola dotación del premiu –20.000 euros–, como “montar una ganadería de lleche”.
Martínez reveló qu’agora escribe tou n’asturianu y que nun tien “intención” de volver escribir en castellanu. “Siéntome más cómodu porque ye la llingua d’Asturies”, esplicó l’autor, de la qu’apunta que ta “minorizada” y “por una anomalía inesplicable nun tien reconocencia oficial nel Estáu”.
Anque escribir n’asturianu, qu’al so xuiciu yera “la llingua de la xente probe”, tien una “carga política y emocional bien interesante”, Martínez manifestó que’l conflictu sobre la so oficialidá “nun existe na sociedá”. “Más de la metá de la población ta a favor y menos del 20 por cientu en contra. Nun hai una polémica real sinón d’unes élites”, sentenció.
(d’Europa Press, 08-11-2019)
Tierra alantre, la mesma fala 
Deixar ua Respuosta