Miguel Rodríguez Monteavaro, col poemariu ‘Superpoderes’; Nicolás Bardio cola novela ‘La Colomina 36’, y Cristian David López, cola obra ‘Basta con tener ganas’; resultaron ganadores, respectivamente, de los premios Asturies Moza de Poesía, Narrativa y Testos Teatrales 2019 que convoca anualmente l’Institutu Asturianu de la Mocedá nel marcu del Programa Culturaquí.
Los trabayos gallardonaos van editase na Colección Texu y cada autor va recibir 150 exemplares. Con ésta, Texu algama les 73 ediciones, lo que la convierte nuna importante muestra de la lliteratura moza asturiana, porque axunta los llibros de tolos premiaos, y na que tán publicaes obres de dalgunos de los meyores escritores de la última xeneración como José Luis Piquero, Jordi Dolce, Ricardo Menéndez Salmón, Ignacio del Valle, Ismael Piñera, Chus Fernández, Jon Bilbao, Sofía Castañón, Miguel Barrero, Rodrigo Olay y José Ángel Gayol, ente otros.
El programa ‘Culturaquí’, que desenvuelve la Conseyería de Presidencia, promueve la creación artística xuvenil nes distintes modalidaes que conformen les artes plástiques, la lliteratura o la música; fomenta la participación de moces con esmoliciones artístiques y publicar estes manifestaciones culturales tanto nel Principáu como fuera de la comunidá.
Miguel Rodríguez Monteavaro (Bual, 1990), tien publicaos trés llibros de poesía: ‘Trenta razois pra nun medrar’ (Trabe, 2010), ‘Todos os triste de mayo’ (Trabe, 2013) y ‘Poemas pra amantes e paquidermos’ (Trabe, 2013). Enantes ganó los premios Xeira de Naracciois Curtias (2009), de Poesía ‘Padre Galo’ (2012) y de Narraciones Curtias de Cangas de Narcea (2014)
Nicolás Bardio (Uviéu, 1987) ye’l novelista más mozu en llingua asturiana. Tien publicaes dos noveles ‘Sol Reló’ (Trabe, 2008) de temática policiaca y la ucronía ástur-caribeña ‘Cuando ensamen les abeyes’ (Suburbia, 2011). En 2019 recaldó más de 12.000 euros pal primer xuegu de rol n’asturianu que va salir en 2020, ‘Depués d’Ochobre’, nel que Asturies ye una República Socialista Soviética que forma parte de la URSS. La novela ‘La Colomina 36’ forma parte d’esti universu de ‘Depués d’Ochobre’ y cuenta una historia de contraespionaxe nuna colomina de Mieres de 1970.
Cristian David López (Lambaré, Paraguay, 2987), graduáu en Llingua Española y les sos Lliteratures pola Universidá d’Uviéu, foi coeditor y traductor de ‘Cantos guaraníes/Guarani purahéi’ (2012) y editor de les ‘Reflexiones y epifonemas de Rafael Barrett’ (2014). Publicó la novela ‘La patria del hombre’ (2015), el llibru de poemes ‘Permiso de residencia’ (2015), los rellatos infantiles ‘Palabres para Martín’ (2017) y ‘Hola, mundo. Diario de un bebe’ (2018). Coordina y edita la revista ‘Areté’.
(d’Europa Press, 16-12-2019)
Tierra alantre, la mesma fala 
Deixar ua Respuosta