PABLO ANTÓN MARÍN ESTRADA
Dalguién definió el xéneru negru como les noveles de caballeríes de la nuestra dómina. La lliteratura n’asturianu nun ye ayena a esi cultivu de la novela policiaca y basta una güeyada a los títulos publicaos dende mediaos de los 80 hasta güei pa decatase de que pocos son los autores qu’alcuando bebieron de les fontes del thriller. Metanes la Selmana Negra que cada branu celebra en Xixón la vitalidá del xéneru prúyenos ufrir una recordanza de la contribución a él na nuestra llingua.
Ye un escritor de la hora más temprana, Xuan Xosé Sánchez Vicente el que da estampa en 1984 a la primera narración de tastu policial: ‘La muerte amiya de nueche’. Ganadora del IV Premiu Xosefa Xovellanos, l’autor válese d’una trama de suspense pa llamar l’atención a cuenta del abandonu qu’una tierra a la so identidá cultural. Nun paez casual qu’al añu viniente algamare’l mesmu premiu la obra d’un autor debutante, Adolfo Camilo Díaz: ‘Añada pa un güeyu muertu’, un títulu qu’inda nun seya en sentíu estrictu negru, asoma un enclín poles formes del thriller modernu que van empobinar al escritor de Caborana a una obra como ‘Miénteme dime la verdá’ (1989), dafechu somorguiada nel xéneru, con un argumentu que paña la complexa heteronimia del portugués Fernando Pessoa como xuegu lliterariu. La fidelidá de Díaz al xéneru perdura hasta ‘Espankin’ (Suburbia, 2010), un descensu a la violencia cotidiana.
Sicasí, la obra más ortodoxa en cuantes a riegles y desenvolvimientu de la narración policiaca ye probablemente ‘L’aire les castañes’ (1989) d’otru autor de la primer xeneración, Vicente García Oliva. Cuenta nesti casu con dos investigadores protagonistes ya inspírase nun casu real d’asesinatu, como ye’l del xixonés Alberto Alonso ‘Rambal’, pa desenvolver una hestoria con fonda carga de crítica social y política hacia les élites escures del poder. Publícase como ‘Miénteme, dime la verdá’ de Díaz, nuna colleción que la editorial Azucel abre precisamente dedicada a la novela negra n’asturianu y na que tamién va apaecer ‘Tráficu de cuerpos’ (1990) de Xandru Fernández, otru nome clave ente los cultivadores del xéneru. Na obra del turonés hai d’igualmiente redes escures y una fondura crítica dica’l xuegu puercu del sistema, un envís que va siguir en ‘El club de los inocentes’ y al empar nel formatu del cuentu breve. Con una asemeyada afinidá a estos autores, atópase Xosé Nel Riesgo, autor de ‘El cai nunca duerme’, premiada pola Academia de la Llingua nel so concursu de novela curtía de 1988. Esti relatu treslládanos a un escenariu gustosu a los clásicos negros americanos como Chandler o Hammett y de los docks neoyorquinos llévanos a los muelles turbios de la ría d’Avilés, coles sos complicaes hestories de droga, corrupción y marxinalidá social. La última aportación significativa al xéneru nesi tiempu ye ‘El cuartu negociu’ (1993) d’Ismael María González Arias, una obra que s’estrema de les anteriores por una soltura narrativa más cenciella y que lleva a les tenebres inda fresques de la guerra n’antigua Yugoslavia.
La buelga de la lliteratura policiaca impresa nes postreres décades del sieglu pasáu va garrar un inesperáu y novedosu puxu ya bien entráu el XXI. Va ser l’escritor, de xuro más allonxáu de los procuros lliterarios del ‘noir asturianu’, Xuan Bello, el que dea al xéneru un xiru nuevu con ‘La confesión xeneral’ (2009), un complexu trhiller esistencial (acabante publicar n’español col títulu ‘Crisis’). Y dos escritores de la xeneración emerxente, Nicolás Bardio con ‘Sol reló’ (2008) y David Artime con ‘Incorrectos’ (2018), van apurrir un acentu distintu a tolo precentente. Tres noveles que namás tienen en común el petite pol thriller pa contar hestories bien estremaes, pero xuníes por una mesma vocación de siguir abriendo-y ventanes a la lliteratura en asturiano.
(d’El Comercio, 07-07-2020)
Deixar ua Respuosta