La Conseyería de Cultura, Política Llingüística y Turismu punxo en marcha na web https://politicallinguistica.asturias.es/ buscadores p’acceder a la toponimia oficial aprobada hasta agora y a un catálogu bibliográficu de les obres más de recién publicaes n’asturianu y gallego-asturianu.
Según indiquen dende’l Gobiernu autonómicu en nota de prensa, la ferramienta dixital de la Dirección Xeneral de Política Llingüística inclúi información sobre les actividaes d’esti departamentu y les novedaes sobre los servicios de normalización llingüística, les convocatories d’ayudes, la Xunta Asesora de Toponimia y el Conseyu Asesor de Política Llingüística, amás de les temes sobre Educación.
La web tien tamién una sección de gallego-asturianu na que, amás d’acceder a diverses informaciones, puen descargase publicaciones editaes nesta llingua pol Gobiernu d’Asturies.
Nel buscador del Catálogu bibliográficu, puen consultase toles obres publicaes n’asturianu y en gallego-asturianu nes últimes cuatro décades. Les busques puen facese per distintes categoríes: autor, añu de publicación, editorial, llingua o xéneru lliterariu.
Nel buscador de toponimia ye posible atopar les formes oficializaes hasta’l momentu. Puen realizase busques per conceyos, parroquies y llugares, tanto dende les denominaciones yá oficializaes como dende les anteriores.
La Xunta Asesora de Toponimia ocupóse hasta la fecha d’emitir dictame sobre los nomes tradicionales de los 78 conceyos, de les sos capitales, les sos parroquies y los núcleos de población.
Amás, el Gobiernu d’Asturies yá aprobó la oficialización d’estos nomes de población pa 68 conceyos, depués de que los conceyos dieren el vistu bonu a los dictames correspondientes. L’últimu conceyu con toponimia oficial aprobada foi Pravia, el mes de febreru.
(d’Europa Press, 24-05-2021)
Tierra alantre, la mesma fala 
Deixar ua Respuosta