La industria editorial n’asturianu prevé publicar 34 novedaes nel 2022, onde destaquen les traducciones

Les editoriales asturianes van publicar nel 2022 un total de 34 novedaes, ente les que destaquen les traducciones de grandes noveles de la lliteratura universal, como ‘Roméu y Xulieta’ de Willian Shakespeare o ‘Les dos torres’ de Tolkien. Amás, tamién hai obres que tovía nun tán publicaes en castellanu, como ‘Guillem’, de la catalana Núria Cadenes.

Son un total de 34 novedaes de siete editoriales que van recibir ayudes del Gobiernu d’Asturies pa la promoción del llibru n’asturianu y en gallego-asturianu, yá sía pa obres orixinales o traducíos d’otres llingües.

Asina, ente les traducciones destaquen ‘Roméu y Xulieta’, de William Shakespeare –traducción de Víctor Suárez–; ‘Anne de Someraos Verdes’, de Lucy Maud Montgomery –traducción de Xabiero Cayarga–; ‘Les dos torres’, de Tolkien –traducción de Nicolás Bardio–; ‘Los amigos de Bernhard’, d’Annemarie Schwarzenbach –María García–; ‘Guillem’, de Núria Cadenes –Miguel Sánchez Canella–; y ‘Kim’, de Rudyand Kipling –Eloy Antuña–.

Amás, tamién va publicase ‘El saber del país’, de John Berger –Daniel García Granda–; ‘Sherlock Holmes. El misteriu de la razón’, d’Arthur Conan Doyle –Xaime Martínez–; ‘El gatu con botes’, de Charles Perrault –Irene Riera–; ‘Los cinco criaos del príncipe, de los Hermanos Grimm –Irene Riera–; ‘Conan el bárbaru’, de Robert E. Howard –Adrián Carbayales–; ‘Matilda’, de Roald Dahl –Víctor Suárez–; ‘La hestoria inacabable’, de Michael Ende –Xesús González Rato–; ‘Los viaxes de Gulliver’, de Jonathan Swift –Víctor Súarez–; y ‘Cantar de mi mesmu’, de Walt Whiman –Milio Ureta–.

Per otru llau, ente les novedaes destaquen ‘Les mudances del tiempu’, de José Ángel Gayol; ‘Tiempu d’escoria’, de Xosé Nel Riego; ‘La llibertá de los caminos’, de José Luis Rendueles; ‘Horizonte de sucesos’, d’Héctor Pérez Iglesias; ‘Mazanes d’iviernu’, de Xabierto Cayarga; ‘Les travesíes del nomada’, d’Ánxel Álvarez Llano; ‘Unes vacaciones bien rares’, d’Esther Prieto; y ‘El mar que m’enchumaza’, de Babel de Cal Cadete.

P’acabar, Marta Mori va publicar ‘Notes de lliteratura asturiana’; David Artime ‘Cróniques d’un machista feminazi’; Luis Salas Riaño ‘Principiu d’incertidume’; Irene Riera ‘Xasón y los argonautes’ y ‘Xuan y les fabes máxiques’; Elías Veiga ‘Réquiem’; Berto García ‘Ítaca’; Pablo Fraile Dorado ‘Bruxa’; Ivana Castañón Vázquez ‘Los páxaros’; Andrés Fernández ‘1809’; y Xandru Martino ‘Vincitur Inimicus’.

ANEXU: Resolución de 15 de payares del 2021, de la Conseyería de Cultura, Política Llingüística y Turismu, pola que se resuelve la convocatoria de subvenciones pa la promoción del llibru n’asturianu y en gallego-asturianu, en réxime de concurrencia competitiva.

(d’Europa Press, 03-12-2021)