Nel añu 2017, los miembros del grupu d’investigación universitariu «Seminariu de Filoloxía Asturiana», Ramón d’Andrés y Miguel Rodríguez Monteavaro, fixeron, gracies a una ayuda del Conceyu de Xixón, una encuesta nesa ciudá que tenía como oxetivu pescudar nes creyencies y percepciones populares sobre la diversidá llingüística d’España y d’Asturies. Agora, con data del 2021, edítase esa encuesta y los sos resultaos nuna edición financiada pola Universidá d’Uviéu nel so programa d’Ayudes pal Caltenimientu d’Actividaes d’Investigación de Grupos d’Investigación Reconocíos 2021.
El cuestionariu, de 36 entrugues, pasóse a 60 persones de Xixón, repartíes n’homes/muyeres, 3 faces d’edá y 3 niveles d’instrucción. Les entrugues del cuestionariu agrúpense nestos apartaos: Llingües y dialectos; Glotodiversidá española; Glotónimu del castellanu; Variedaes del castellanu; Les variedaes llingüístiques d’Asturies; El castellanu n’Asturies; La fala de Xixón; L’asturianu: glotónimu; L’asturianu: llingua o dialectu; L’asturianu: comparanza con otres llingües; Variedaes del asturianu.
A lo llargo del llibru va repasándose cada entruga, col so enunciáu, la xustificación de facela, tables y gráfiques de resultaos, y la so interpretación y otros comentarios. Ente tables y gráficos (estos en color) sumen en xunto 185 figures.
El llibru ofrez datos enforma interesantes, como la percepción que tien la xente de lo que ye una «llingua» y un «dialectu», cómo l’asturianu encaxa nesos conceptos, qué llingües d’España enumera la xente cuando se-yos pide facelo, cómo perciben la diversidá dialectal dientro del castellanu, cómo-yos suenen les llingües d’España, qué noción tien la xente de la realidá llingüística d’Asturies, etcétera.
Ficha bibliográfica:
Andrés Díaz, Ramón d’ & Miguel Rodríguez Monteavaro (2021): La diversidá llingüística d’España y d’Asturies. Encuesta na ciudá de Xixón, 2017, Uviéu: Ediciones Trabe / Universidá d’Uviéu. Páxines: 154. ISBN: 978-84-18286-81-0.
(del Seminariu de Filoloxía Asturiana, 09-02-2022)
Tierra alantre, la mesma fala 
Deixar ua Respuosta