“Nun puede ser que lo que val pal PP en Galicia nun tenga aplicación n’Asturies”

Xosé Antón González Riaño (Siero 1956) ye pedagogu y catedráticu de la Universidá d’Uviéu, onde se doctoró en 1993 con una tesis doctoral sobre les interferencies llingüístiques ente l’asturianu y el castellanu, cola qu’algamó’l Premiu Estraordinariu de Doctoráu. Ye, amás, presidente de l’Academia de la Llingua Asturiana dende 2017 y miembru de la institución dende 1987. Nesta entrevista facemos balance nel día de les Lletres, del procesu fracasáu de negociación de la oficialidá y de les perspeutives qu’hai pa la próxima llexislatura.

El procesu de reforma del estatutu pa incluyir la oficialidá nun pudo ser nesta llexislatura, ¿qué valoración fai?

El procesu de reforma del estatutu que diba llevar a la oficialidá del estatutu foi un procesu que representó una deceición mui fonda pa les persones que llevábemos décades pidiendo que se cumpla n’Asturies l’Artículu 3 de la Constitución. Foi una oportunidá histórica perdida pola falta d’esperiencia. Pero la reivindicación va siguir hasta que se llogre y la deceición nun mos puede llevar a una frustración q xenere falta de puxu. Toi seguru que va haber más ocasiones y que la próxima puede ser inmediatamente nesta próxima llexislatura. 

 Una de les coses que pueden permitir esa próxima oportunidá ye un nuevu actor que llegó a la política española: L’expresidente de Galicia Alberto Núñes Feijoo, que siempre dixo que la diversidá llingüística yera dalgo bono. ¿Cómo valoráis dende l’Academia la llegada d’esti nuevu discursu? ¿Pensáis que’l PP va sumase al consensu constitucional?

– Dende l’ALLA siguimos con munchu interés esti cambiu llideralgu del PP a nivel estatal. Trátase d’un presidente que vien d’una comunidá billingüe cola llingua normalizada y con un billingüismu que xenera consensu social, dinamismu cultural y desarrollu económicu venceyáu a la cuestión llingüística. Dende esi puntu de vista, anque pueda haber dalguna resistencia dientro de dellos sectores del PP d’Asturies, esti mensaxe tien que calar. Nun puede ser que’l  mensaxe que valga pa Galicia nun tenga aplicación n’Asturies. Nós tenemos rellación como Academia con sectores del PP y tresmitimos cuála ye la nuesa posición con respeuto a la oficialidá qu’Asturies necesita y tamos enfotaos en que na próxima llexislatura tamién se pueda xenerar un cambiu y una adaptación de los mandatos constitucionales.

Entós en xeneral, de cara a 2023 y a la próxima llexislatura… ¿Veis les coses con pesimismu o con optimismu?

-Véolo con realismu. Lo primero qu’hai que facer ye autocrítica: la deceición foi mui fonda y dexóse pasar una oportunidá hestórica por falta d’esperiencia per parte de los sectores favoratibles a la cuestión llingüística. La próxima véola con realismu y entiendo qu’esi realismu ye ver posible repetir los 27 d’esta llexislatura. Tamién veo posible un cambiu de posición nel centru-derecha, concretamente nel PP, que tien qu’entrar al consensu constitucional nesta materia. Nós hemos renovar los argumentos, falar con ellos, plantegar y esplicar. Lo óptimo sedría que los dos grandes partíos dende’l puntu de vista de la so representatividá tuvieren d’alcuerdu nuna cuestión que p’Asturies ye una cuestión d’estáu como ye’l reconocimientu de los derechos civiles dende’l puntu de vista llingüísticu.

Dos nuevos académicos: Lisardo Lombardía y Inaciu Galán: ¿Qué vos llevó a escoyer a estes persones? Tamién el fechu de que tengamos un académicu de númberu, que ye dalgo poco habitual. ¿Qué s’espera d’un académicu?

Ye cierto que pue llamar l’atención qu’una persona moza de 36 años entre direutamente como miembru de númberu. Yo siempre faigo alcordanza con otros miembros de la institución, que cuando nós entramos tábemos al rodiu de los 30 y dalgunos de nós entramos con menos de 30. Daquella dicíase que l’ALLA nun paecía una academia afitada porque yéremos demasiao mozos, cosa que se solucionó col pasu del tiempu. Agora necesitamos nuevu puxu y sobre too per parte de xente que tenga cualidaes personales, de formación, académiques, cualidaes de conexón social, de de busca de rellaciones etc. Nesi sentíu lo que se-y va pidir a Inaciu Galán ye qu’emplegue les sos enerxíes y los sos saberes p’ameyorar la proyeición social de la Institución y tamién p’ameyorar tol ámbitu de les rellaciones institucionales que tan bien remana y domina Inaciu Galán. Paeznos que ye un apueste decidíu pola renovación y de da-y a l’ALLA una nueva oportunidá de conectar con sectores que col pasu del tiempu teníemos un poco alloñaos.

En rellación a Lisardo, hai que dicir que ye una referencia cultural n’Asturies dende la Transición política. Ye en parte ideólogu de la nueva música n’Asturies y na rellación ente la música y la llingua y del papel social que xuega la música nel procesu de normalización. Lisardo Lombardía ye nesti procesu un nome a señalar. Ye una persona de sonadía internacional incuestionable y dende esi puntu de vista encaxa perfeutamente cola idea de miembru d’honor d’institución. Lo que-y pidimos nesti casu ye que siga siendo embaxador de la música y la cultura d’Asturies.

Centrándonos na Academia como institución de normativización ¿Qué proyeutos tien l’ALLA per delantre? La sociedá tien necesidá de guía colos neoloxismos, como se vio con pallabres como mázcara/embozu/mazcarina col andanciu. ¿Qué proyeutos tenéis nesi sen?

El proyeutu más importante que desendolca agora l’ALLA ye’l diccionariu del eonaviego, un proyeutu que consideramos d’una importancia estratéxica de primer nivel p’Asturies y nel que punximos lo meyor de nueso pa configurar un equipu del que formen parte investigadores del Navia-Eo, doctores en filoloxía del Navia-Eo… Esti equipu lleva yá añu y mediu trabayando con gran eficacia y regularidá y con munchos llogros dende’l puntu de vista técnicu-científicu. Hai tamién proyeutos paralelos como una comisión llingüístico-filolóxica que trabaya na anovación del DALLA. Dende esa perspeutiva, tamos faciendo una revisión d’enquivocos dende’l puntu de vista formal y técnicu, omisiones, pallabres nueves que se necesiten y ehí tamién hai una comisión técnica que ta anovando’l propiu diccionariu. Esti añu, amás, voi falar d’ello’l día de les lletres, vamos recuperar tamién tolos concursos d’investigación de l’ALLA que por mor del presupuestu y del andanciu, quedaron un poco en segundu planu. Vamos a potenciar lo que ye’l Termast, el centru de la nueva terminoloxía n’asturianu porque vémonos na necesidá d’adaptar la llingua no que se llama l’adautación funcional del léxicu y l’adautación a nueves realidaes col envís de solucionar les nueves situaciones de comunicación que surden cada día.

Otru de los grandes proyeutos de l’ALLA ye la UABRA. ¿Esti añu va haber Universidá Asturiana de Branu (UABRA) presencial?

Esti añu igual que l’añu pasáu va haber UABRA pero desgraciadamente va ser una UABRA non-presencial. Tuviemos faciendo un esfuerzu y yo personalmente fixi un esfuerzu fondu cola universidá, visitando Cangas de Narcea y paeznos que nun se dan les circunstancies ambientales y d’infraestructures pa poder facelo con seguridá de manera presencial. Va ser una UABRA virtual al traviés de Teams como na pasada edición, pero la idea ye recuperala como un ámbitu d’interaición ente persones que conviven y deprienden nel mesmu ámbitu físicu.

Tocando yá’l tema de la política llingüística d’esti primer gobiernu de la democracia favoratible a la oficialidá: ¿Cómo valora l’ALLA la Política llingüística que se ta desendolcando? ¿La xestión de Berta Piñán ye Meyor o peor que la de Genaro Alonso? ¿Qué esperen de lo que queda de llexislatura? 

Como presidente de l’ALLA llamento munchísimo les circunstancies peles que tuvimos que pasar. Ye la primer vegada que gobierna un partíu que previamente asumiere programáticamente’l tema de la oficialidá. Esto ye una cuestión práuticamente ensin precedentes nos gobiernos d’Asturies. Siguimos con interés los nomamientos de la conseyera de Cultura, Política Llingüística y Turismu y del Direutor Xeneral porque son persones inequívocamente comprometíes cola nuesa realidá política y a los que’l nomamientu-yos llegaba nun momentu de madurez y d’esperiencia pa facer coses. La pandemia frustró en gran midida lo que pudo ser una política llingüística novedosa y pon munches dificultaes pa xulgar la so xestión. Pa poder xulgala fadría falta tar nuna situación de normalidá que nun se dio. ¿Pudo llevase a cabu una política llingüística? Non, les circunstancies impidiéronlo y yo nun puedo xulgar les circunstancies.

Y centrándonos yá nel futuru, ente que la oficialidá llega y non, ¿Cómo habría ser la política llingüística del “mentanto”?

La meyor política llingüística ye que la Xunta Xeneral que s’escueya en 2023 aborde’l procesu dende l’entamu y empezar seriamente’l procesu de reforma del estatutu. Pero, dende llueu, col marcu xurídicu actual puede facese política llingüística. Hai tres cuestiones:

Presencia nos medios de comunicación: La TPA Y la RPA han xugar col asturianu nuna posición d’equilibriu col castellán. A lo llargo de la próxima llexislatura hai que llograr un porcentaxe que puede ser 50-50 en TV y mayoritariu na radio. Necesítense espacios informativos, deportivos, magacines n’asturianu… Ésti ye un retu que se puede llevar alantre col marcu xurídicu actual. No que cinca la Radio hai más esperiencia y podría avanzase a que l’asturianu fore la llingua mayoritaria na RPA.

L’ámbitu de la enseñanza: Nesi ámbitu nun se tán poniendo en práutica toles posibilidaes que’l marcu xurídicu ufierta. Hasta esti momentu lo que se fai n’asturianu ye plantegar o ofrecer la posibilidá de que l’alumnáu curse llingua asturiana. Pero ye que’l marcu normativu nun ye namás escoyer voluntariamente l’asignatura – con toles dificultaes que surden – sinón de lo que fala’l marcu ye de promover, non namás ufiertala, sinón promovela; y tamién fala de dignificar l’usu de la llingua aturiana nos centros educativos. Tamos desdexándolo, “puedes escoyelo o non, ehí ta pal que lo quiera”. Eso ye insuficiente col marcu normativu actual. Dende’l puntu de vista del curriculum hai qu’ameyorar horarios, profesoráu, etc..

L’asturianu na vida institucional. L´asturianu ha trescalar la dinámica de les conseyeríes y dende’l puntu de vista de la visualización: Denomaciones, señalética, parte de la documentación…etc. Eso puede facese con una bona planificación llingüística. Eso ye política llingüística de caltenimientu ensin escaecer que l’oxetivu final tien que ser siempre la negociación al rodiu de la oficialidá.

(de Nortes, 07-05-2022)