DIEGO DÍAZ ALONSO
La obra “La Vieya”, del escritor Aique Fernandi, escoyóse como la ganadora del II Premiu Radagast. El xuráu taba compuestu pol escritor y precursor de la ciencia ficción n’asturianu Dolfo Camilo Díaz, el traductor y estudiosu de la ciencia ficción Víctor Suárez y la ganadora del añu pasáu, Blanca Fernández Quintana. “La Vieya” ye una novela adulta que trata’l tema de la mitoloxía celta dende una perspeutiva actual y con pingarates d’horror.
Otra manera, nel actu presentóse tamién la novela de la edición anterior y primera ganadora del Premiu, “Trovadoresca”, segunda novela de la escritora yerbata Blanca Fernández Quintana que ta acabante de salir pa la Selmana de les Lletres. Trovadoresca parte d’un festival de poesía oral onde la protagonista, Dora, decátase de que tien un “don” únicu: el de ser a ver y a falar cola pantasma de Bermudo, ún de los trovadores más importantes que tuviere la Península (o eso diz él) y que, nun se sabe cómo, ta ehí cola so figura espectral y los sos comentarios extemporales en plenu sieglu XXI. Una novela de fantasía urbana y humor que xira alredor d’un secretu familiar.
El Premiu Radagast: únicu d’iniciativa privada
La editorial asturiana Ediciones Radagast lleva yá dos años convocando’l Premiu Radagast de Lliteratura Fantástica, Ciencia Ficción y Terror. Esti premiu, l’únicu de novela n’asturianu d’iniciativa privada, convócase añalmente y pretende reconocer a la meyor novela de ciencia ficción, terror y lliteratura fantástica del añu. Nesta segunda edición, un total de 4 obres compitieron pol gallardón. El premiu consiste nun diploma, 300€ en metálico y la publicación de la obra. La tercer edición del premiu yá ta convocada.
(de Nortes, 09-05-2022)
Tierra alantre, la mesma fala 
Deixar ua Respuosta