Celebróse en na Universidá de Lleón, del llunes 16 al xueves 19, el XII Congresu Internacional d’Historia de la Llingua Española. Na sección de «Filoloxía Asturlleonesa» hebo trés comunicaciones procedentes de la Universidá d’Uviéu:
–La profesora Marta Pérez Toral faló sobre «Análisis léxicu de voces valdesanes a partir de les papeletes del padre Galo», onde dio un repasu dialectolóxicu y etimolóxicu a una serie de palabres asturianes emplegaes por Fernán Coronas nes sos papeletes lexicográfiques, publicas apocayá nun llibru publicáu pol Real Instituto de Estudios Asturianos.
–El profesor Ramón d’Andrés impartió la comunicación titulada «Evolución del estudiu de la frontera xeolectal ente asturianu y gallegu». Nella fai un repasu históricu en dos planos: les etapes nel avance na conocencia xeolectal d’esa frontera y cómo eso va formando «discursu llingüísticu»; y cómo surden factores estrallingüísticos (conciencia de los falantes, xuegu d’identidaes, polítiques llingüístiques, etc.) que condicionen dellos aspectos del discursu llingüísticu.
–La profesora Claudia Elena Menéndez Fernández espunxo la comunicación titulada «Notes sobre’l léxicu de la ropa na documentación del Hospiciu d’Uviéu (ss. XVIII-XIX): interferencies ente asturianu y castellanu». Forma parte d’una investigación sobre’l rexistru escritu de neños güérfanos nesi periodu; son testos redactaos en castellanu, pero con una gran cantidá d’asturianismos léxicos y gramaticales, lo que ye muestra de la vitalidá de la llingua asturiana na ciudá d’Uviéu daquella.
(del Seminariu de Filoloxía Asturiana, 20-05-2022)
Tierra alantre, la mesma fala 
Deixar ua Respuosta