Asturies va ser la invitada d’honor na 51 edición del Festival Intercélticu de Lorient, onde va mostrar la “riqueza renovada” de la cultura tradicional.
La programación impulsada dende la Conseyería de Cultura, Política Llingüística y Turismu, en collaboración cola organización del certame bretón, va mostrar propuestes artístiques “innovadores que beben de la tradición y la reinterpretan al traviés de la fusión y los formatos nuevos”, según informó’l Gobiernu asturianu al traviés d’una nota de prensa.
El Principáu va destinar 200.000 euros al pabellón d’Asturies, onde se van desenvolver actos especiales del 5 al 14 d’agostu, pola so elección como convidáu d’honor.
El cartel inclúi una decena de conciertos, actividaes lliteraries y una esposición del artista llavianés Ricardo Villoria. La nueche d’apertura del festival, el sábadu 6 d’agostu, va tener como protagonista la música asturiana, que va facer un homenaxe al desaparecíu Elías García.
L’espectáculu ‘Música pa tornar páxaros’, dirixíu por Mapi Quintana, va recordar nel escenariu de Le Théâtre al músicu fináu en 2019, con un repertoriu compuestu especialmente pa Lorient.
Amás, pel escenariu del pabellón asturianu van desfilar del 5 al 14 d’agostu nueve artistes y bandes asturianes que van ufiertar un abanicu de propuestes que, bebiendo de les melodíes y cantares tradicionales, incorporen influencies d’otros soníos y cultures.
Dende la música electrónica, pasando pel reggae o los ritmos afrollatinos, la fusión tien protagonismu nun programa del que van formar parte Llevólu’l Sumiciu, Eva Tejedor & Les Pandereteres, ¿Aú?, Rubén Alba y Nel de Pumea, Algaire, Baxel, La Garrapiella y Monteavaro, Muñalén & Rodrigues. El pabellón d’Asturies va cuntar con 375 metros cuadraos de superficie.
Otra manera, l’área destinada a la gastronomía rexonal y los productos asturianos va tener un restaurante, una zona pa echar sidra, un estand d’Alimentos del Paraísu y otru d’información turística. Pa eso, el pabellón asturianu va disponer de seis carpes y dos bungalows.
Xunto la programación especial de la edición, la organización del certame cuntó amás con artistes asturianos de sonadía dientro del cártel oficial. Ye’l casu de Llan de Cubel, que va ufiertar un conciertu na denominada ‘Gran nueche d’Asturies’ xunto al gaiteru José Ángel Hevia. Tamién Rodrigo Cuevas va sumase anguaño al elencu d’artistes festival bretón xunto José Manuel Texedor, Silvia Quesada, Proyecto Breizh Asturies, Cerezal, L-R, Muga, Javier Menéndez, Fabián Fernández, la Banda Gaites Llacín y el Grupu de baille Trebeyu. Fernando Vázquez, Jaime Álvarez, Daniel Meré y Diego Lobo van ser los gaiteros asturianos participantes nel Troféu MacCrimmon.
Artes visuales y lliteratura
La esposición ‘Llabor’, del artista Ricardo Villoria, va mostrar la so personal visión de la cultura que vivió dende neñu. Al traviés de dellos formatos (fotografía, indumentaria y audiovisuales), Villoria somorguia al espectador nel so pasáu, muestra’l presente y proyecta la busca del futuru.
La lliteratura tamién va tar presente na programación diseñada pa Lorient. Autores en llingua asturiana van participar en charles y meses redondes pa dar cuenta del “escepcional momentu” pela que pasa la producción lliteraria n’asturianu.
El Festival Intercélticu de Lorient celebróse pela primer vez na localidá bretona en 1971 pa convertise nun gran puntu d’alcuentru de les llamaes naciones celtes. Les rexones participantes son, amás d’Asturies, Galicia, Irlanda, Escocia, Bretaña, Gales, Isla de Man y Cornualles. Dende l’añu 2000 foron incorporándose diverses comunidaes con emigración celta como Estaos Uníos, Australia, Nueva Zelanda, Chile, Arxentina, Méxicu, Rumanía o Italia.
(d’Europa Press, 23-05-2022)
Tierra alantre, la mesma fala 
Deixar ua Respuosta