La Xusticia impidió a Xicu Ilesies, un vecín de La Felguera, camudar nel rexistru’l so nome y apellíos p’adaptalos a la forma asturiana. La llexislación permite esto dende hai años cola documentación del interesáu y un certificáu de l’Academia de la Llingua qu’acredite la forma asturiana.
Sicasí, Xicu Ilesies tuvo qu’entregar pruebes de que llevaba décades usando esi nome pa, finalmente, refugalo alegando que nun acreditara “abondo” esi usu del nome y, nel casu d’apellíu, indícose-y que “nun pue realizase nin la traducción d’un apellíu nin l’adaptación gráfica a otra de les llingües d’apellíos que sían del mancomún nacional”.
El diputáu de Podemos, Rafael Palacios, acompañó esti llunes en rueda de prensa a Xicu Ilesies, que denunció que se llama Xicu dende los 16 años, anque nel carné tea como Francisco José Iglesias. “Na invitación de boda hai 40 años, na orla, nel buzón, en tolos sitios llámenme y conócenme como Xicu”, esplicó.
Al xubilase, l’afectáu decidió entamar colos trámites nel Rexistru Civil de Llangréu p’adaptar el so nome a la grafía asturiana. Tuvo que solicitar un certificáu d’empadronamientu nel Xulgáu de Paz de Sobrescobiu “y ehí yá s’empezó a desmadrar l’asuntu”.
“Ellí fixéronme una entrevista na que se me somete a una presión absoluta, amenaciándome con tolos males del mundu y too polos perxuiciu ideolóxicos del secretariu contrariu a la llingua asturiana”, indicó.
En Sobrescobiu pidiéron-y un testigu –dalgo que nun establez la llexislación pa realizar un cambiu de nome a una de les llingües d’España– y presentó dos. A partir d’ehí mandaron l’espediente al xulgáu de Llaviana y ellí pidieron informe al fiscal, que-y concedió’l cambiu de nome pero non el d’apellíu.
Énte eso, presentó recursu y el fiscal contestó-y que “quiero sustituyir el convencimientu del xuez pol míu propiu”. Ilesies presentó un recursu d’apellación y, finalmente, depués de cuatro años de periplu xudicial, la Dirección Xeneral de Seguridá Xurídica nun autorizó’l cambiu del nome nin del apellíu.
“Ta claro qu’esto depende de l’arbitrariedá del funcionariu, xuez o fiscal, esta denuncia pue facer dañu a xente qu’a partir de mañana quiera entamar esti procedimientu porque pue que nun lo autoricen a naide. Tamos énte un casu de discriminación llingüística”, denunció Ilesies.
Per otru llau, el diputáu Rafael Palacios indicó que la so formación va acompañar a Xicu xurídicamente “porque nos paez un casu grave, intolerable y llamentable que supón un retrocesu”. “Ye un ataque intolerable a los derechos llingüísticos de los asturianos”, indicó, pa indicar que’l casu surdió por “perxuicios ideolóxicos” y una cuestión de “irracionalidá”.
“Ábrese la puerta a que la discrecionalidá del funcionariu de turnu impida que les persones puedan exercer el so derechu”, esplicó Palacios, pa denunciar que la xustifica ta dexando de llau l’informe de l’Academia de la Llingua que valida la forma ‘Xicu Ilesies’.
(d’Europa Press, 19-12-2022)
Tierra alantre, la mesma fala 
Deixar ua Respuosta