L’asociación Grana entamó la primer edición del Premiu Yolanda Huergo pa trabayos d’investigación, que quier reconocer obres inédites de cualesquier estaya de conocimientu y llinia d’estudiu fechos o traducíos al asturianu.
La dotación del premiu ye de 1.500 euros y Grana va promover la publicación del trabayu premiáu. Los trabayos, con un mínimu de 100 páxines, han de mandase, enantes del 1 de xunetu de 2023, a la dirección email info@asociaciongrana.com.
Yolanda Huergo
Yolanda González Huergo, que nació en Xixón en 1971 y yera funcionaria nel área d’Urbanismu de Siero dende l’añu 2004, participó en dellos movimientos sociales, como’l de la defensa de la oficialidá de la llingua asturiana.
Tamién militó en formaciones asturianistes como la coalición Bloque por Asturies-Unidá Nacionalista Asturiana, de la que foi númberu dos pola circunscripción central nes elecciones autonómiques del 2011.
Yera una de les cares visibles del ala más asturianista de Podemos y en 2018 foi escoyida candidata de la formación nel Conceyu de Xixón. Destacada militante de la Xunta pola Defensa de la Llingua Asturiana, la llucha pola oficialidá yera ún de los sos principales compromisos sociales. Yolanda Huergo morrió en 2020 a los 49 años d’edá depués d’una enfermedá llarga.
(de La Nueva España, 09-03-2023)
Tierra alantre, la mesma fala 
Deixar ua Respuosta