El portavoz de la Xunta pola Defensa de la Llingua Asturiana (XDLA), Xosé Candel, criticó esti martes que la Demarcación de Carreteres del Estáu n’Asturies nun tien “la mínima sensibilidá cola llingua del territoriu nel que tienen competencies”.
En declaraciones a Europa Press, Candel esplicó que nel proyectu p’acuriosar un tramu de la N-634, que ta en fase d’información pública, los cartelos de la señalización vertical nun cumplen la llexislación asturiana sobre toponimia oficial.
El proyectu va necesitar d’informes, ente otros organismos, de la Conseyería de Cultura, Política Llingüística y Turismu, porque afecta al trazáu del Camín de Santiagu. Por eso, depués de recibir la quexa d’un ciudadanu alvirtiéndolos de la situación, dende la XDLA punxéronse en contactu cola Dirección Xeneral de Política Llingüística pa qu’actúe énte esta situación.
Candel recuerda que los topónimos tradicionales de Siero, Llangréu, Xixón y Uviéu son oficiales por mor de los decretos respectivos, pero “la falta d’oficialidá del asturianu fai que la consideración que tien la llexislación toponímica asturiana pol Ministeriu de Tresportes sía la de una llexislación menor, de segunda, que ye de cumplimientu voluntariu y non prescriptivu, como tendría que ser si tuviere amparada pol Estatutu d’Autonomía”.
(d’Europa Press, 07-03-2023)
Tierra alantre, la mesma fala 
Deixar ua Respuosta