Sal a la venta “Vikingos 2035”, la comuna anarquista na L.luarca post-apocalíptica y “El Xuegu d’Ender”

Ediciones Radagast saca “Vikingos: 2035” y “El Xuegu d’Ender” les dos propuestes de ciencia ficción. Un clásicu y una novela bien asturiana.

La primer propuesta trescurre nel añu 2035. Una catástrofe afaró’l mundu y la enfermedá llevó a la inmensa mayoría de la xente per delantre. Tolos asturianos tán muertos… ¿Toos? Non. Una comuna anarquista de los últimos supervivientes álzase sobre les ruines de lo qu’un día foi L.luarca. Esta ye la innovadora propuesta del escritor carbayón Abel Martínez. Una distopía post-apocalíptica na que siguimos los pasos d’Amaro, un superviviente de la catástrofe nel que la enfermedá avanza más lento de lo normal. Sobreviviendo como pue, llega hasta l’Arca los Llobos, una comuna que s’auto-organiza de manera idílica nes ruines de lo qu’un día foi L.luarca hasta que dalgo peligroso vien de la mar.

Read Full Post »

Nicolás Bardio: «En Radagast apostamos por facer llibros que llea la xente»

Nicolás Bardio (Uviéu, 1987) ye escritor y narrador asturianu. Autor de les noveles Sol Reló (Trabe, 2008), Onde ensamen les abeyes (Suburbia, 2011), La Colomina 36 (Trabe, 2020) cola que ganó’l Premiu Asturias Joven de Narrativa, y Del llau del nigromante (Radagast, 2021).

Ye tamién el promotor Depués d’Ochobre, el xuegu de rol n’asturianu, ucronía ambientada na República Obrera y Campesina d’Asturies llueu de que triunfare la Revolución d’Ochobre de 1934 y Asturies pasare a formar parte de la Unión Soviética.

Dende l’añu 2018 dirixe Ediciones Radagast, onde edita obres lliteraries de fantasía y ciencia ficción. Con él falamos de la trayectoria d’esta editorial que va garrando puxu nel panorama lliterariu asturianu.

¿En qué momentu surde la idea de fundar una editorial especializada en fantasía y ciencia ficción n’Asturies y principalmente n’asturianu?

Pos la verdá ye que dalgo que surde a últimos de 2019 col éxitu que tuvimos con Depués d’Ochobre. Eso fixo posible disponer de perres coles que poder montar la editorial, apostar polos primeros llibros que sacamos y facer frente a tolos trámites necesarios, que nun son pocos.

Read Full Post »

La revista «Formientu» celebra cinco años

La revista lliteraria Formientu va despidir l’añu y a dellos de los sos autores más vieyos nun actu que se va celebrar nel chigre L’Ayalga (c/ Prendes pando 11, Xixón), el xueves 29 d’avientu, a les 20:00 hores. L’actu va valir tamién pa recaudar fondos pa l’asociación Iniciativa pol Asturianu, creada va poco, pos tolos ingresos pola venta de revistes que se faigan esi día van tar destinaos al llabor d’esta organización.

Xareos! Xestión Cultural ye la entidá responsable de la publicación de Formientu, que cumplió apocayá cinco años, con una periodicidá biañal. Depués d’esti tiempu, y col oxetivu de caltener vixente’l subtítulu de «Revista de lliteratura mui moza», llegaba’l momentu de dicir adiós a dellos de los sos collaboradores, qu’entamaron siendo bien mozos y que tienen yá encadarmada una carrera lliteraria, con premios y volúmenes propios nel mercáu en munchos casos.

Read Full Post »

Novedá lliteraria

ANTÓN GARCÍA

Nesti númberu de Formientu, el doble 7-8, nun se nota’l cambiu d’editor. Acierten en Xareos! manteniendo un diseñu que personaliza pa bien el resultáu final. Formientu subtítulase «Revista de lliteratura mui moza», y fai bandera de la creación lliteraria de los más nuevos. Nun podemos evitar que se nos alcuerde esa frase atribuyida a George Bernard Shaw: «La mocedá ye una enfermedá que se cura col tiempu». Pero depués de seis años saliendo, esta revista insiste nello, na xuventú, y nel Entamu Laura Marcos acota pa númberos futuros la edá de participación: nacíos depués de 1980. Eso sí, failo con humor, citando a Ángel González: «Vivir para ver: ¡joven poeta de cuarenta años! / ¿Último logro de la geriatría? / No; retrasado mental, sencillamente».

Read Full Post »

La revista Formientu asoleya númberu doble 7-8 con testos d’autores lleoneses y asturianos

La revista Formientu, asoleyada por Xareos! Xestión Cultural, espubliza un númberu doble (7-8) nel qu’hai munches novedaes bien importantes. La revista espubliza per primer vegada un autor en fala, Miguel R. Monteavaro (Bual, 1990), y cunta amás con delles collaboraciones d’autores qu’entá nun espublizaren en Formientu. Ye’l casu de Pablo A. Quiroga, Paula Pulgar, Alex Fernandi, l’autor más mozu de la revista (Uviéu, 1992), o David Artime, que mos presenta un estractu del premiu Trabe de Narraciones, que llevó la so novela «La bufanda», una de les obres con más ésitu en 2010.

Amás nel númberu apaecen autores habituales na revista, como Héctor Pérez Iglesias, Abel Martínez, Jorge Fernández, Ricardo Candás y José Ángel Gayol, que dan amuesa de la lliteratura con más esperiencia.

Read Full Post »

Falláu el II Certame Lliterariu de La Caleya

El pasáu 24 de xaneiru fízose públicu el fallu del “II Certame Lliterariu La Caleya 2008 Reinu de Llión”, convocáu pola asociación La Caleya y l’ayuntamientu d’Estorga. Na categoría de rellatos recibíu el primer premiu Jonatan Rodríguez pola obra El castigu de San Juanicu y na de poesía foi pa Milio Gancedo pol poemariu tituláu Un país de vinu y lleiche.

Read Full Post »