SUATEA critica la hipocresía de la Conseyería d’Educación pa cola llingua

Dende SUATEA apunten que “tando acabante d’anunciar que ta iguando la documentación pa solicita-y al Ministeriu d’Educación y Cultura el reconocimientu de la especialidá docente de Llingua Asturiana, pervieya reivindicación dende va trenta años, tantos como hai de presencia del asturianu na enseñanza, la Conseyería y el gobiernu asturianu pretenden agora mangase la medalla de grandes defensores de la llingua del país, cuando la rialidá ye que la política de l’actual Conseyería d’Educación ye la del maltratu permanente a la materia, a quien la imparte y a quien la recibe”.

El sindicatu remembra que “llarga ye la llucha que los docentes d’asturianu y gallego-asturiano lleven faciendo p’algamar un reconocimientu asemeyáu al del restu del colectivu docente, polo demás bien maltratáu por esti gobiernu. Xeneralización de les medies xornaes, horarios antipedagóxicos, males artes pa desincentivar la matriculación de los estudiantes, desamparu permanente… Bona parte d’esta situación achacábase y achácase a l’ausencia d’una especialidá docente tanto en Primaria como en Secundaria que dignificara la materia y estabilizara’l so profesoráu al traviés d’un procesu de concursu-oposición, yá que’l 95% del mesmu ye personal interín. La rialidá ye que, siendo la especialidá imprescindible p’avanzar na dignificación, la Conseyería d’Educación pudo y puede facer muncho más pola escolarización de la llingua asturiana. De fechu, abulta paradóxico, por nun dicir hipócrita, que pretendan agora dir de defensores del idioma cuando hubo que llevalos a los tribunales pa facelos cumplir la Llei d’Usu de 1998”.

Read Full Post »

L’Asamblea de Docentes d’Asturianu va aconceyar el xueves con González

PABLO R. GUARDADO

Alredor d’un centenar de persones axuntáronse baxo la lluvia n’Uviéu pa reclamar dignidá pa la materia de Llingua Asturiana nel sistema educativu. Los maestros van treslladar les sos demandes el xueves a la conseyera Ana González.

Dende les 18.30 hores d’ayeri, y hasta les 19.15 hores, profesores de Llingua Asturiana y Gallego-asturiano, militantes del movimientu de reivindicación llingüística y ciudadanos concentráronse na uviedina Escandalera tres la pancarta utilizada en movilizaciones anteriores que reza ‘L’asturianu, como les demás, nes escueles y oficial’, lema que los manifestantes glayaron en delles ocasiones. “Pal tiempu que fixo, con lluvia y aire, nun tamos descontentos de la convocatoria. Hubo xente y la cosa tuvo al final bastante animada”, señaló Emma Rodríguez García, de l’Asamblea de Docentes d’Asturianu. Esti coleutivu lleva trabayando dende que se conoció’l borrador de la Llei Orgánica pa la Meyora de la Calidá Educativa (LOMCE), conocida de manera popular como Llei Wert, pa que l’asignatura nun sólo nun pierda’l so espaciu actual nel sistema educativu, sinón que tamién algame un presencia digna, al igual que’l restu de llingües del Estáu.

Read Full Post »

Xuan Xosé Sánchez Vicente, poeta

ANTÓN GARCÍA

L’autor más importante del primer Surdimientu ye Xuan Xosé Sánchez Vicente (Xixón, 1949), fundador de Conceyu Bable, de l’Academia de la Llingua o del Partíu Asturianista, tres exes esenciales del asturianismu nos años setenta, ochenta y noventa del pasáu sieglu XX. Ye autor de cuatro diccionarios indispensables, de miles de páxines d’ensayu políticu, lliterariu o llingüísticu, ente les que podemos destacar el llibru «Les producciones clasiscistes d’Antón de Marirreguera» (2004), un estudiu lúcidu y eruditu sobre la obra del nuesu primer escritor. Tamién ye un críticu atentu y arrogante d’esta lliteratura, al que debemos les primeres reediciones de los clásicos («Esvilla de poesíes na llingua asturiana», 1979, modernización de l’antoloxía de Caveda de 1839), los primeros estudios sobre les nueses lletres dende dientro d’elles y una guía esencial p’averase a esta lliteratura, «Crónica del Surdimientu (1975-1990)», publicada en 1991 y que pide una actualización que traiga hasta los nuesos díes el repás de lo fecho.

Read Full Post »

SdlLl: Pablo Texón

El nome de Pablo Texón (Felechosa, Ayer, 1977) apareció hai unos años como ún de los más prometedores de la lliteratura asturiana y güei ye yá una realidá a la qu’avalen poemarios (Toles siendes, La culpa y la lluz) y obres en prosa (Catedral, L’alma robada) que-y valieron el respaldu de crítica y llectores. Consideráu ún de los autores más representativos de la Tercer Xeneración del Surdimientu, tamién quixo contestar al cuestionariu qu’El Cuaderno-yos mandó a dellos nomes propios de la cultura asturiana con motivu de la Selmana de les Lletres.

Al marxe de les responsabilidaes polítiques y del marcu llegal que recueyen l’articuláu y les disposiciones de la Llei d’Usu y Promoción del Asturianu, discutible y conflictivu a lo llargo d’estos años, quiciás diba ser bono facer un autoanálisis dende dientro, una autoevaluación de los aciertos y los erros que se fixeron dende les instituciones que más se destacaron na defensa y promoción del asturianu. Nesti sen, ¿cómo valora usté, nun índiz que sía lo más equilibráu posible d’aciertos y fallos, la trayectoria de l’Academia de la Llingua y de la Oficina de Política Llingüística?
Lo primero que quiero dicir ye que l’Academia de la Llingua Asturiana y la Oficina de Política Llingüística son dos entidaes que disponen d’una dotación económica y de personal mui ruina, que vienen teniendo un pesu mui escasu nos distintos gobiernos d’Asturies y que, en términos xenerales, actúen con esfuerzu y dedicación. Dicho esto, nun voi ser yo quien cargue sobre los costinos de nenguna d’elles la responsabilidá de la situación social que vive la llingua asturiana. Aclaro esto porque considero que ye un disparu fallíu’l qu’apunta a l’ALLA o la OPL que nos tuvo entreteníos bien de tiempu. Mirar pa elles como culpables ye inxusto y cruel. Y lo peor, engañoso. L’ALLA cumplió col so llabor normativizador. Fixo muncho más de lo esperable en virtú de la precariedá a la que se ve sometida pol gobiernu d’Asturies. En dellos momentos, quiciabes nun supo ofrecer una cara más amable o cercana y pudo estralimitar les sos funciones. Visto con perspectiva, nun se pue dexar de dicir que yeren momentos mui críticos pal futuru del idioma y que s’intentaba tapar una carencia no político. La OPL, por motivos evidentes, tien una trayectoria más errática y dispar que l’ALLA. En xeneral, consiguió una incidencia social más grande que la que facíen prever los sos recursos y la so influencia nos gobiernos. Da la sensación de que son vistos dende dientro como un caballu de Troya. Nesi sentíu, la so capacidá d’acción nun pue ser grande.

Read Full Post »

SdlLl: Xandru Fernández

Son munchos los que consideren a Xandru Fernández (Turón, 1970) ún de los narradores más importantes de la lliteratura asturiana, faceta a la qu’hai que sumar una trayectoria poética que quedó recoyida hai poco nel volume Restauración (Trea). Autor de noveles como Les ruines, El suañu de los páxaros de sable o La banda sonora del paraísu, Fernández, que ganó la última edición del Xosefa Xovellanos con El príncipe derviche (que va llegar a les llibreríes nes próximes selmanes), ye otru de los autores a los que quixo consultar El Cuaderno con motivu de la Selmana de les Lletres.

Al marxe de les responsabilidaes polítiques y del marcu llegal que recueyen l’articuláu y les disposiciones de la Llei d’Usu y Promoción del Asturianu, discutible y conflictivu a lo llargo d’estos años, quiciás diba ser bono facer un autoanálisis dende dientro, una autoevaluación de los aciertos y los erros que se fixeron dende les instituciones que más se destacaron na defensa y promoción del asturianu. Nesti sen, ¿cómo valora usté, nun índiz que sía lo más equilibráu posible d’aciertos y fallos, la trayectoria de l’Academia de la Llingua y de la Oficina de Política Llingüística?
Los aciertos de l’Academia de la Llingua: construir della ferramienta básico de cualquier procesu normalizador (el Diccionariu, la Gramática) y promover el consensu científicu sobre la llingua asturiana. Los sos errores más bultables: proyectar una imaxe mui poco simpática y nun saber revolvese como lo que ye, un muérganu del Principáu d’Asturies coles sos facultaes y les sos limitaciones; amás d’eso, l’Academia nun pue siguir dándo-y el llombu a la lliteratura. La OPL, pel so llau, acierta cuando sigue un programa, un plan de normalización pa la llingua, y enquivócase cuando se ve reducida a una instancia burocrática ensin guía definida, como ye’l casu anguaño.

Read Full Post »

SdlLl: Xuan Xosé Sánchez Vicente

Falar con Xuan Xosé Sánchez Vicente (Xixón, 1949) tien interés por dos cuestiones: la de so ye una de les obres más valoraes de cuantes dieron los escritores que se inxerten no que se conoz como Primer Promoción del Surdimientu y, amás, la so faceta de políticu y ensayista conviértelu nún de los que más reflexonaron sobre l’asturianismu y les sos implicaciones llingüístiques y lliteraries. Él ye’l primeru que s’enfrenta a un cuestionariu que remitimos dende El Cuaderno a delles figures relevantes del asturianismu cultural, y éstes son les sos respuestes:

Al marxe de les responsabilidaes polítiques y del marcu llegal que recueyen l’articuláu y les disposiciones de la Llei d’Usu y Promoción del Asturianu, discutible y conflictivu a lo llargo d’estos años, quiciás diba ser bono facer un autoanálisis dende dientro, una autoevaluación de los aciertos y los erros que se fixeron dende les instituciones que más se destacaron na defensa y promoción del asturianu. Nesti sen, ¿cómo valora usté, nun índiz que sía lo más equilibráu posible d’aciertos y fallos, la trayectoria de l’Academia de la Llingua y de la Oficina de Política Llingüística?
Discrepo na valoración que se fai al respective de la Llei d’Usu y Promoción, entamada, emburriada y llograda pol PAS. Tien más valir y posibilidaes de les que se-y tán sacando (de fechu afaló critiques d’inconstitucionalidá pol so conteníu y emburrió «cuestiones d’inconstitucionalidá» xurídiques). Dotramiente, y según se dixera nel so día, ye la único que vamos tener en munchos años, si non «lo único», a cencielles. A partir d’equí vamos dir p’atrás, nun solo na so aplicación, sinón nel marcu xurídicu. Piénsese, per exemplu, que nel borrador de reforma estatutaria últimu (albortáu dende Madrid, por otres cuestiones) PSOE y PP modificaben l’artículu cuartu en sentíu regresivu. La situación, agora, empeora, con un partíu como UPyD que tien como oxetivu esplícitu degradar l’autonomía. Nesi sen, col aplausu de los asturianos, vien sumase a la política de despreciu y menospreciu de los demás partíos centraliegos hacia l’asturianu y la cultura asturiana.

Read Full Post »

Les bases pa la normalización

DAMIÁN BARREIRO

La Xunta pola Defensa de la Llingua Asturiana nació a primeros de 1984. Col pasu los años, la reivindicación foi a más y la organización foi medrando en pesu social. Sicasí, faltaba una propuesta que marcara per ónde tendría qu’empobinar el procesu de normalización. Asina nació en 1996 el Llibru blancu de la recuperación y normalización llingüística d’Asturies, un documentu que quería estudiar la situación del nuestru idioma pa encarase cola realidá, estudiala y proponer víes pa iguala en delles estayes fundamentales: enseñanza, medios de comunicación, llexislación, alministración y normativización.

Read Full Post »

El Comité d’Espertos pal siguimientu de la Carta de les Llingües aconceya con una representación asturiana

La Xunta pola Defensa de la Llingua Asturiana, l’asociación Caveda y Nava, l’Academia de la Llingua, l’Aconceyamientu de Xuristes pol Asturianu y una representación del Gobiernu asturianu aconceyó esti xueves 7 de xunetu en Madrid col Comité d’Espertos pal siguimientu de la Carta de les Llingües Minoritaries del Conseyu d’Europa.

Dende la Xunta pola Defensa de la Llingua quixeron tresmitir a les autoridaes europees la necesidá d’un marcu xurídicu que permita asegurar «derechos fundamentales a la ciudadanía». Según la XDLA, los datos presentaos pol Gobiernu asturianu, que tamién participó nel conceyu, «pa xustificar la so supuesta política llingüística», son un «llaváu de cara» pa tapar la parálisis na normalización y tol tiempu ensin nengún avance significativu nuna situación «de desigualdá xurídica».

Read Full Post »

L’Academia de la Llingua reedita «Llingua y sociedá asturiana»

L’Academia de la Llingua acaba de facer una reedición facsimilar del llibru tituláu Llingua y Sociedá Asturiana, de Xosé Lluis García Arias. Esta obra foi’l primer ensayu publicáu n’asturianu. Orixinalmente foi l’asociación Conceyu Bable quien la punxo na cai nel añu 1976. Posteriormente, la editorial Alborá Llibros volvió a editalu na so colección Comuña Lliteraria con delles correcciones y actualizaciones. Ésta última ye precisamente la qu’agora pon a disposición de tolos interesaos l’ALLA na so colección Llibrería Facsimilar.

Read Full Post »

Riopedre: “El Principáu yá desendolcu’l curriculu d’asturianu”

D. BARREIRO

Riopedre afirmó que yá se completó’l desendolcu curricular de l’asturianu en toles etapes y calificó a la UABRA como “exemplu pa esparder la cultura asturiana”.

El Conseyeru d’Educación y Ciencia, José Luis Iglesias Riopedre, inauguró güei la Universidá Asturiana de Branu (UABRA), una nueva iniciativa que ponen en marcha conxuntamente la Universidá d’Uviéu y l’Academia de la Llingua, y que cunta cola collaboración de la Conseyería d’Educación y Ciencia. La Universidá Asturiana de Branu va tener la so sede permanente en Cangas.

Read Full Post »