Xilberto Llano presenta Boliescritu de primavera esti vienres na Biblioteca d’Asturies

Esti vienres 11 de payares, a les 19:00 h, preséntase na Biblioteca d’Asturies «Ramón Pérez de Ayala» la obra infantil Boliescritu de primavera, de Xilberto Llano, ganadora del XIII Premiu María Josefa Canellada de Lliteratura Infantil y Xuvenil y publicada agora pola editorial Impronta . Acompaña al autor na presentación l’escritor Aique Fernandi.

Ambientada nos primeros díes del confinamientu de 2020, cuenta cómo pasen esos díes unos neños y neñes dientro del mesmu edificiu.

(de la Dirección Xeneral de Política Llingüística, 08-11-2022)

Read Full Post »

La Tertulia Malory escueye ‘Onde’l caos se texe y se destexe’, de Xulio Viejo, como meyor llibru n’asturianu del añu 2021

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2021 la novela Onde’l caos se texe y se destexe, del escritor y profesor universitariu Xulio Viejo. El xuráu formáronlu los escritores Xulio Arbesú, José Luis Rendueles, Solinca Turbón, Roberto Corte, Aique Fernandi, Beatriz Quintana, David Fernán, Chechu García y Henrique G. Facuriella, que fallaron el premiu nun actu celebráu na tertulia’l viernes 7 de ochobre de 2022.

El xuráu destacó, nel acta del fallu, cómo’l llibru «amuesa una narrativa híbrida d’un valir lliterariu altu, qu’afita de forma perfecha’l camín de lo universal a lo llocal, siendo quién a empatar  a historia familiar con un territoriu míticu y, al empar, real, como ye Quirós, y que furrula como una métafora d’Asturies y del orixe mesmu de la cultura occidental». El xuráu tamién quixo rescamplar la calidá tan grande de la producción lliteraria n’asturianu del añu 2021, lo que fixo que la decisión de premiar la novela de Xulio Viejo se garrara por mayoría depués d’una votación apretada.

Read Full Post »

“La Vieya”, una hestoria de celtismu y terror, Premiu Radagast

DIEGO DÍAZ ALONSO

La obra “La Vieya”, del escritor Aique Fernandi, escoyóse como la ganadora del II Premiu Radagast. El xuráu taba compuestu pol escritor y precursor de la ciencia ficción n’asturianu Dolfo Camilo Díaz, el traductor y estudiosu de la ciencia ficción Víctor Suárez y la ganadora del añu pasáu, Blanca Fernández Quintana. “La Vieya” ye una novela adulta que trata’l tema de la mitoloxía celta dende una perspeutiva actual y con pingarates d’horror.

Otra manera, nel actu presentóse tamién la novela de la edición anterior y primera ganadora del Premiu, “Trovadoresca”, segunda novela de la escritora yerbata Blanca Fernández Quintana que ta acabante de salir pa la Selmana de les Lletres. Trovadoresca parte d’un festival de poesía oral onde la protagonista, Dora, decátase de que tien un “don” únicu: el de ser a ver y a falar cola pantasma de Bermudo, ún de los trovadores más importantes que tuviere la Península (o eso diz él) y que, nun se sabe cómo, ta ehí cola so figura espectral y los sos comentarios extemporales en plenu sieglu XXI. Una novela de fantasía urbana y humor que xira alredor d’un secretu familiar.

Read Full Post »

La Tertulia Malory escueye Les isles inciertes, de Xuan Bello, como meyor llibru n’asturianu del añu 2020

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2020 al poemariu Les isles inciertes, del escritor y periodista Xuan Bello. El xuráu tuvo formáu polos escritores Xulio Arbesú, José Luis Rendueles, Solinca Turbón, Roberto Corte, Laura Marcos, Aique Fernandi, Beatriz Quintana, David Fernán, Chechu García y Henrique G. Facuriella, que fallaron el premiu nun actu celebráu na tertulia’l 19 de payares de 2021.

El xuráu destacó, nel acta del fallu, «ye un poemariu atemporal, nel que l’autor fai un diálogu cola tradición poética universal, nun viaxe d’enorme valor artísticu onde resuenen los ecos de los grandes maestros»; el xuráu tamién punxo en vallir la gran calidá de la producción lliteraria n’asturianu del añu 2020, lo que fixo que la decisión de premiar el poemariu de Xuan Bello se garrara por mayoría.

Read Full Post »

«Memoria de Tuña», d’Antón García, meyor llibru n’asturianu del añu 2019 pa la Tertulia Malory

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2019 la novela Memoria de Tuña, del escritor, editor y actual Director Xeneral de Política Llingüística del Gobiernu d’Asturies, Antón García. El xuráu tuvo formáu polos escritores Xulio Arbesú, José Luis Rendueles, Solinca Turbón, Pablo Rodríguez Medina, Roberto Corte, Aique Fernandi, Chechu García y Henrique G. Facuriella, que fallaron el premiu nun actu celebráu na tertulia’l 4 de setiembre de 2020.

El xuráu destacó, nel acta del fallu, «La novela guarda una unidá tonal, l’autor ye quien a construir, a partir de la señaldá y el sentimientu, un universu simbólicu, onde con emoción controlada facer un homenaxe al pueblu, la familia, la infancia y la tradición”, amás de la calidá de la producción lliteraria n’asturianu del añu 2019, lo que fixo que la decisión de premiar la novela d’Antón García se garrara por mayoría.

Read Full Post »

Les traducciones de ‘1984’ y ‘Drácula’ y el poemariu nuevu de Xuan Bello, principales novedaes lliteraries pa la seronda

A lo llargo de la seronda van llegar a les llibreríes la traducción al asturianu del clásicu de George Orwell ‘1984’ y de Bram Stoker ‘Drácula’ , amás de ‘Les isles inciertes’, el poemariu nuevu del escritor Xuan Bello, Premiu Nacional de Lliteratura Asturiana.

‘1984’ ye una novela de ficción política y distópica, escrita pol inglés George Orwell y publicada en 1949. Con versión n’asturianu de Xesús González Rato, el llibru centra la historia nuna sociedá vixilada por un hermanu mayor, na que se regula’l pensamientu al traviés de la llingua y na que la premisa ye lo que nun tien nome nun pue pensase.

Trátase d’una crítica al totalitarismu que ye una de les obres emblemátiques del sieglu XX. Con esta novela, yá considerada un clásicu, Ediciones Trabe principia la Colección Calume (‘munchu fondu’), dirixida pol historiador y ensayista Rafael Rodríguez Valdés.

Read Full Post »

La Tertulia Malory escueye ‘Incorrectos’, de David Artime, como meyor llibru n’asturianu del añu 2018

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2018 la novela Incorrectos, del escritor y periodista David Artime Coto. El xuráu tuvo formáu polos escritores Xulio Arbesú, José Luis Rendueles, Solinca Turbón, David Fernán, Roberto Corte, Aique Fernandi, Chechu García y Henrique G. Facuriella, que fallaron el premiu nun actu celebráu na tertulia’l 21 de xunu del 2019.

El xuráu destacó, nel acta del fallu, «l’arquitectura narrativa, el ritmu y la fondura psicolóxica de caún de los personaxes protagonistes d’una obra que va muncho más p’allá de la premisa argumental, al poner al llector énte un espeyu qu’enseña los demonios de la sociedá d’anguaño con un realismu grande», amás de la calidá altísima de la producción lliteraria n’asturianu del añu 2018, lo que fixo que la decisión de premiar la novela d’Artime se garrara por mayoría.

Read Full Post »