Formientu presenta’l númberu 17 na Selmana Negra de Xixón

La revista lliteraria Formientu, que sal en papel dende l’añu 2006 y ta codirixida polos escritores Diego Solís y Claudia Elena Menéndez, llega con un númberu nuevu a les llibreríes d’Asturies y col oxetivu de siempres, dar visibilidá a los y les escritores mozos n’asturianu.

La revista llega con esti al númberu 17 y la primer presentación va tener llugar esti miércoles 10 de xunetu a les 20:45 hores na Carpa de la Pallabra de la Selmana Negra de Xixón, cola presencia de los directores y d’Inaciu Galán, de Cuatro Gotes Producciones, encargada de la xestión editorial.

Advertisements

Read Full Post »

Alba Carballo y Pablo Cueto ganen el I ‘Qué guapo ye querese’

El Conseyu de Mocedá de Xixón y la Oficina de Normalización Llingüística entamaron esti concursu lliterariu destináu a xente mozo.

Convocáu con motivu del Día Européu de les Llingües pa fomentar l’usu del asturianu ente la mocedá y l’emplegu del mesmu pa falar de too tipu de materies, amás de p’averar la lliteratura a la xente mozo y fomentar un bon querer hacia l’idioma o les persones, alloñáu nesti casu últimu del amor románticu tan enraigonáu na nuesa sociedá, el I ‘Qué guapo ye querese’ taba dividíu en dos estayes. Na correspondiente al rangu d’edá comprendíu ente los 19 y 25 años, la ganadora foi Alba Carballo, con ‘Desnudu nel sable’, mentes que Claudia Gutiérrez Lueje, con ‘El dolor caltria’, y Borja Riestra, con ‘La entruga’, llevaron el segundu y tercer premiu, de manera respeutiva.

Read Full Post »

Cuestión de tiempu

ANTÓN GARCÍA

Formientu, revista de lliteratura MUI moza
Númberu 14, avientu 2015
Xixón, Xareos!, 2015

Dende hai dellos númberos, la revista «Formientu» que dirixe Inaciu Galán dedica les últimes páxines a apurrir una amuesa de cómo escribíen los nuesos payuelos enantes de que cumplieren los trenta años, esa barrera temporal que permite tar dientro o fuera d’esta publicación. Pepín de Pría o Pachín de Melás yá salieron nesa estaya, si nun me confundo. Nesta nueva entrega, la númberu 14 d’una revista que camina pa cumplir los diez años, ye Ángel de la Moría (1858-1895) quien asoma a eses páxines. El testu escoyíu d’esti autor que dalguna vez clasificamos dientro de la Xeneración del Folclore ye un sonetu, «Al Carrocéu». La inclusión d’estos endecasílabos espresivos y sonoros zarrando la revista (con un error grave nel testu: nel versu 12 corrixen el “to” orixinal –del verbu tener = tengo o teo– como “too”, indefiníu) complica abondo, no llingüístico y no lliterario, la valoración de la nueva lliteratura “mui moza” que xurde nestes páxines.

Read Full Post »

Poesía y narrativa mozo n’asturianu, nel últimu númberu de la revista Formientu

La nueva xeneración de poetes y narradores en llingua asturiana presenta una bona muestra de la so producción nel últimu númberu de la revista lliteraria Formientu, editada por Xareos Xestión Cultural.

La publicación, qu’algama yá los sos diez años de vida, incorpora nesta ocasión a un autor portugués qu’escribe en mirandés. Trátase de Tiégui Alves, residente en Burdeos, y que presenta dos muestres de la so producción poética.

Moisés Cima, Claudia Elena Menéndez, Francisco Priegue, Andrés Astur Treceño, Naomi Suárez o Berto Cla son otros poetes incluyíos nesti últimu númberu, na so mayor parte nacíos nos años 90. Marcos Salazar, Alba Carballo, Alicia Cortina y Xurde Álvarez Antón, ente otros, apurren les sos creaciones a la estaya de narrativa.

Read Full Post »