Feeds:
Antradas
Comentairos

Posts Tagged ‘Amparo Elena Sarrión’

AsturtOOns trátase d’un proyeutu que nació pa poner color a la lliteratura infantil pa neños y neñes, tanto n’asturianu como en castellanu. L’escritor y ilustrador Enrique Carballeira Melendi (L’Infiestu, 1970) ye’l so responsable de publicaciones.

¿Cuándo surdió’l proyeutu d’AsturtOOns?
Allá pel 2005 la mio hermana y yo entamamos a facer dellos trabayos alrodiu de la publicidá, el diseñu y les publicaciones. Asina nació AsturtOOns, como un proyeutu pa trabayar dientro del mundu del diseñu, la ilustración y la publicidá. Les primeres publicaciones centráronse nos personaxes de les tires d’humor gráficu que yo espublizo dende va más de 20 años na prensa:’ Les coses de Nardo y Quina’. Foron bien recibíes y a partir d’ehí decidimos siguir espublizando dalguna coleición de lliteratura ilustrada, naciendo d’esta forma la coleición ‘Llingua de Trasgu’, onde había la idega de facer llibros que llegaran bien a los llectores principales, los neños, con muncha promoción y presencia nel ámbitu escolar. (more…)

Read Full Post »

INACIU GALÁN

Jorge Fernández y Amparo Elena Sarrión asoleyaron xuntos dos llibros: una biografía novelada d’Einstein cola editorial Universos y un llibru pa los más pequeños con Asturtoons, “El lladrón de galletes”, amás, tamién xuntos, algamaron dalgunos premios como’l de teatru de l’Academia de la Llingua Asturiana o los de cuentos curtios Art Nalón y Bilordios de Pinón. Falamos con ellos de les sos novedaes caberes y de les sos creaciones en marcha, na Entrevista de la selmana.

Acaben d’asoleyar dos obres escrites a comuña. Una d’elles de calter más ensayísticu, la biografía novelada d’Einstein, ¿cómo se consigue convertir una biografía, que pue paecer daqué espeso, nun llectura pa rapazos?
Lo primero ye ponese nel pelleyu d’un neñu de 8, 9 ó 10 años que va garrar un llibru sobro una biografía d’un personaxe perconocíu y camentar qué ye lo que-y pue gustar atopar nella. Después hai que buscar eses coses curioses, eses anéudotes que-y den la chispa d’allegría y cercanía al personaxe que los neños busquen.

Munches vegaes la xente escaez que los grandes homes y les grandes muyeres de la historia fueron neños y mozos y que sintieron, amaron y amalaron como cualesquier otra persona. L’enfotu foi averar esa visión más cercana, más personal y más asemeyada a la vida de nueso y amosar la parte más “humana” del xeniu. Si a eso xunimos que-y dimos puxu a tola parte infantil y xuvenil de la vida d’Eisntein ganamos un migayu l’atención del públicu infantil. (more…)

Read Full Post »

Asturtoons Editorial va poner en marcha esti próximu martes 27 y el miércoles 28, la iniciativa d’El taller de les histories, una actividá qu’empieza l’asociación de madres y padres del Colexu Públicu de L’Infiestu. Na actividá van participar neños del Piloña que van trabayar técniques coles que van desarrollar, de forma colectiva, l’argumentu d’una historia. Tamién van deprender dalgunos detalles sobre’l trabayu d’ilustración d’un llibru.

El taller va impartilo l’escritor y ilustrador piloñés Enrique Carballeira. Como cierre de l’actividá, el miércoles a les seis de la tarde, y na mesma Casa la Cultura, la editorial Asturtoons va presentar tres de los sos últimos titulos publicaos n’asturianu: L’Arcu la Vieya, de Cristina Muñiz; El lladrón de galletes, d’Amparo Elena Sarrión y Jorge Fernández, y Diariu de Nelo, d’Enrique Carballeira.

(de Les Noticies, 23-12-2011)

Read Full Post »