Inscripción abierta pa les XXXIX Xornaes Internacionales d’Estudiu

Les Xornaes Internacionales d’Estudiu de l’Academia de la Llingua Asturiana vuelven llueu del parón pandémicu. La Facultá de Filosofía y Lletres de la Universidá d’Uviéu acueye tres díes d’actividaes académiques, ponencies, comunicaciones y presentaciones que, en xunto, faen bona amuesa del trabayu d’investigación llingüística n’estayes bien estremaes.

Asina, nel tarrén sociollingüístico, l’académicu y caderalgu de la Universidá del País Vascu, Francisco Llera Ramo, va presentar el III Estudiu del Navia-Eo y Reglindis de Ridder, profesora de la Universidá d’Estocolmu, va falar de la importancia sociollingüística de la traducción audiovisual. Dientro d’otros enfoques de la traducción tamién van lleer ponencies los profesores Vicent Escartí (de la Universidá de Valencia) y Cláudia Martins (de la Universidá d’Aveiro). La nómina de ponentes inxer tamién a Simona Georgescu (Universidá de Bucarest), que va falar de les aportaciones del asturianu a la etimoloxía románica, y a Aurelio González Ovies (Universidá d’Uviéu), que participa con una conferencia sobre’l retornu a la infancia na poesía d’Asturies. Otres ocho comunicaciones curties, dos presentaciones y un diálogu sobre l’asturianada ente Carlos Rubiera y Héctor Braga, completen el programa d’estes XXXIX Xornaes Internacionales d’Estudiu dirixíes por Ana María Cano González y Carmen Muñiz Cachón, de la Universidá d’Uviéu.

Read Full Post »

Los primeros datos del III Estudiu Sociollinguísticu d’Asturies anunciaránse nes selmanes próximes

PABLO R. GUARDADO

El mes de xunu ye la fecha que se manexa pa la espublización de los primeros datos del III Estudiu Sociollingüísticu d’Asturies, encargáu pola ALLA a Francisco José Llera Ramos. El caderalgu de Ciencia Política foi ún de los compareciente de la sesta sesión de la Comisión Especial d’Estudiu sobre’l Réxime de Proteición y Promoción del Asturianu na Xunta Xeneral.

Xunto col caderalgu de Ciencia Política, intervinieron nesta ocasión Xabiel González Menéndez, presidente de Xeira; José Manuel Pérez Fernández, lletráu del Tribunal Constitucional y profesor titular de Derechu Alministrativo de la Universidá d’Uviéu; l’espertu gastronómicu Lluis Nel Estrada; el biólogu Bertu Ordiales; el sacerdote José Manuel García de Jesús ‘Pin’, presidente del Coleutivu Manuel Fernández de Castro; Carlos Pulgar, voceru nacional de la Xunta pola Defensa de la Llingua Asturiana (XDLA); Fernando Álvarez-Balbuena, vicepresidente de l’asociación El Teixu-Rede pal Estudiu y Defensa de la Llingua Asturllionesa; y Penélope Miranda, vocera de l’Asociación de Trabayadores de la Normalización Llingüística. Nesta ocasión tuvieron representaos toles formaciones polítiques, anque’l del PP s’ausentó mientres una bona parte de la sesión.

Read Full Post »

PSOE, Podemos, IX, Foro y C’s apauten una Proposición de Llei pa iguar la situación llegal de l’ALLA

En feches prósimes va ser presentada con calter urxente una Proposición de Llei con oxetu de modificar l’artículu 2 de la Llei 5/1997 d’Academies del Principáu d’Asturies que permita la inclusión de l’Academia de la Llingua Asturiana como institución de Derechu Públicu del Principáu d’Asturies.

Esta reforma de la Llei va ser presentada por cinco de los seis grupos de la Xunta, por tanto la so tramitación y aprobación va ser segura. El Partíu Popular nun figura entre los firmanes de la proposición. Esta ausencia “nun ye d’estrañar viendo les últimes declaraciones de los populares al rodiu de la llingua asturiana”, afirma la diputada de Podemos Lucía Montejo.

Read Full Post »

L’Academia de la Llingua Asturiana reedita ‘Sol en los pomares’

Espublizada nel 1948 en México, ‘Sol en los pomares’ ye la obra más renomada del autor xixonés. Con entamu del escritor José Vasconcelos y ilustraciones del artista xixonés Germán Horacio, fíu de Pachín de Melás, axunta poemes populares de calter costumista, humorísticu o sentimental.

Matías Conde de la Viña (Xixón, 1896) desendolcó dende mozu les sos aficiones lliteraries, collaborando davezu en selmanarios llocales. Por mor la Guerra Civil emigró nel 1937, primero a Francia y depués a México, onde vivió hasta’l 1982, añu en que morrió.

Read Full Post »

La Comisión sobre l’asturianu concreta’l llistáu de comparecientes na sesión prevista na Xunta Xeneral

PABLO R. GUARDADO

Políticos, espertos y profesionales venceyaos cola llingua asturiana y otros idiomes, como’l gallegu y el catalán, van participar na Xunta Xeneral na Comisión sobre l’asturianu pa dar la so visión. Asturies.com ufre la llista completa.

La Comisión Especial d’Estudio sobre’l Réxime de Proteición y Promoción del Asturianu, qu’oficialimente tien el nome en castellanu y que nun emplega l’idioma pol vetu fechu pol Partido Popular (PP), busca con estes intervenciones conocer la opiniones y esperiencia d’espertos y profesionales venceyaos cola llingua asturiana y otros idiomes asemeyaos cola fin d’ellaborar una conclusión que sirva pa la redaición definitiva del Plan de Dignificiación del Asturianu. Estes intervenciones van celebrase na Xunta Xeneral nuna fecha entovía por concretar.

Read Full Post »

Cano demanda la especialidá docente y recuerda que “queda pocu tiempu yá” pal final de la llexislatura

PABLO R. GUARDADO

Ana María Cano, presidenta de l’ALLA, demandó otra vuelta la especialidá docente d’asturianu y recordó que “queda pocu tiempu yá” pal final de la llexislatura. La conseyera Ana González prometió qu’ésta sería una realidá nesti mandatu.

Sicasí, les pallabres de Cano nel pieslle oficial de la Universidá Asturiana de Branu (UABRA) nun llegaron de forma direuta a González, ausente una vegada más nun actu rellacionáu cola llingua asturiana, sinón que la presidenta de l’Academia de la Llingua Asturiana (ALLA) pidió a Ana Fueyo, direutora de Política Llingüística y representante del Gobiernu nel actu, que se lo treslladara a la conseyera d’Educación, Cultura y Deporte. Foi precisamente na UABRA del añu pasáu, en concreto na inauguración oficial en Cangas del Narcea, cuando González prometiera esta demanda vieya de l’ALLA pa esta llexislatura, pero lo cierto ye que nun se ven munchos movimientos al respeuto. Por contra, Fueyo, en conversación posterior con Asturies.com, aseguró que la conseyería taba trabayando nello.

Read Full Post »

L’alcalde de Cangas del Narcea pide la celebración del Día de les Lletres Asturianes nel conceyu

PABLO R. GUARDADO

José Luis Fontaniella, alcalde de Cangas del Narcea, solicitó la celebración del Día de les Lletres Asturianes nel conceyu. Foi nel piesllu oficial de la Universidá Asturiana de Branu (UABRA) celebráu nel paraninfu de la Universidá d’Uviéu.

Alredor d’un centenar de persones acudieron al actu del vienres, nel que se repartieron los diplomes y certificaciones a los alumnos que superaron los cursos de la UABRA: el ‘Elemental de Llingua Asturiana’, el ‘Avanzáu de Llingua Asturiana’ y el de ‘Capacitación en Gallego-asturiano’, amás de los cuatro d’afondamientu cultural y llingüísticu, esto ye, el de ‘Capacitación pa la traducción al asturianu’, el de ‘Internet y escuela. Nueves aplicaciones socioeducatives’, el de ‘Ecoloxía y Mediu Ambiente n’Asturies’ y el de ‘Cantares, bailles ya instrumentos musicales asturianos’. El secretariu de la UABRA, Pablo Xuan Manzano, foi l’encargáu de lleer los nomes de les persones que superaron los cursos, mentes que Vicente Gotor, rector de la Universidá d’Uviéu; Ana María Cano, presidenta de l’Academia de la Llingua Asturiana; l’alcalde Fontaniella; y Xosé Antón González Riaño, direutor de la UABRA, entregaron los diplomes y certificaos a los alumnos.

Read Full Post »

González comprométese “a regularizar” la situación del profesoráu d’asturianu

La conseyera d’Educación, Ana González, comprometióse a “regularizar al profesoráu d’asturianu, tanto de Primaria como de Secundaria”. Foi na inauguración oficial de la Universidá Asturiana de Branu (UABRA) que se celebra en Cangas.

En concreto, la tamién responsable de Cultura y Deporte, dixo apostar nesta llexislatura por “regularizar, dar carta d’identidá dientro del ámbitu educativu al profesoráu d’asturianu, y neso tien el mio compromiso”, comentó la conseyera faciendo referencia al discursu previu d’Ana María Cano, presidenta de l’Academia de la Llingua Asturiana (ALLA), nel que volvió a reclamar la especialidá. “Toi convencida que l’añu qu’entra, que voi tar equí, taremos falando d’eso, porque igual tovía nun ta finao, pero podremos dicir que tamos dando los pasos necesarios pa regularizar al profesoráu d’asturianu, tanto de Primaria como de Secundaria”, añadió.

Read Full Post »

L’Área de la Muyer del PP de Xixón entama una xornada sobre cultura y lliteratura asturianes

PABLO R. GUARDADO

El Centru de Cultura Antiguu Institutu va acoyer el llunes una xornada sobre cultura y lliteratura asturianes entamada pol Área de la Muyer del PP xixonés. La mitoloxía, la llingua y la lliteratura con firma femenina protagonicen les actividaes.

“L’oxetivu d’esta iniciativa ye contribuyir a la promoción de la llingua y la cultura de la nuestra comunidá autónoma, asina como reflexar la presencia de les muyeres en dambes, y pa ello, preparáronse unos conteníos que pensamos resultarán mui atractivos pa la xente”, esplica Elena González, responsable del Área de la Muyer del Partido Popular (PP) de Xixón, que tolos años entama una xornada temática. “Nesta ocasión quisimos tratar dalgo tan cercano y valoratible como ye la nuestra cultura”, añade. Pilar Fernández Pardo, presidenta del PP xixonés, va abrir la xornada a les 11 hores pa llueu dar pasu a Alberto Álvarez Peña, que va facer una ‘Introducción a la etnografía asturiana’. Darréu, va proyeutase’l documental ‘Rincones secretos: Mitología de Asturias’.

Read Full Post »

L’ALLA pide la intervención d’Álvarez-Cascos tres conocer una mengua nueva nel so presupuestu

El recorte final del presupuestu de l’Academia de la Llingua Asturiana (ALLA) va ser del 40 por cientu. Esta mengua nueva, conocida’l llunes por Ana María Cano, lleva a la presidenta a reclamar la intervención de Francisco Álvarez-Cascos.

Según informó Cano, l’ALLA pasa de recibir 230.000 euros nel 2011 a 134.320 euros nel 2012 y non los 167.900 euros que nun primer momentu s’esperaben. Esta mengua nueva na cantidá confirmóla’l direutor de Política Llingüística, Alfredo Ignacio Álvarez Menéndez, ayeri a la presidenta de la institución académica. “Dixóme que se recortaba de tolos sitios y qu’a nosotros nos tocaba un 40 por cientu”, a pesar de que’l contestu presupuestariu nel país ye una prórroga de les cuentes del 2011. Por esti motivu, Cano reclama la intervención d’Álvarez-Cascos y pide al restu de grupos políticos que s’impliquen y se pronuncien ante lo que considera una “situación mui inxusta”

Read Full Post »