“En Xixón fixéronse munches coses en normalización llingüística nestos 15 años”, destaca María Xosé Rodríguez

PABLO R. GUARDADO

“Ye un percorríu pelos 15 años de la normalización llingüística en Xixón”, esplicó María Xosé Rodríguez López, responsable del serviciu, sobre la esposición qu’esti miércoles abrió les sos puertes nel Centru de Cultura Antiguu Institutu. Ésta acompáñase d’un videu de 15 minutos de llargor y va poder visitase hasta’l 17 de xineru.

La Oficina de Normalización Llingüística cumple 15 años y el SNL xixonés celébralo col entamu d’una amuesa que repasa’l llabor normalizador fechu pol Conceyu de Xixón dende que n’ochobre del 2003, nun despachu de la Conceyalía d’Educación y Cultura de l’Antigua Pescadería con Carmen Rúa como edil, ellaboróse’l primer presupuestu y el primer programa. Trés meses depués, el 21 de xineru del 2004, presentóse de manera oficial la Oficina Municipal de de la Llingua de Xixón, nome col que nació, na sala de receiciones de la Casa Conceyu.

Read Full Post »

“La Normalización Llingüística tien que tar presente nuna de les conceyalíes”, afirma María Xosé Rodríguez

PABLO R. GUARDADO

Una conferencia sobre los 14 años de vida de la Oficina de Normalización Llingüística de Xixón abrió les II Xornaes de Normalización Llingüística nos Conceyos. La so responsable, María Xosé Rodríguez López, destacó la necesidá de contar con una conceyalía de Normalización Llingüística.

“Ye importante retomar esti asuntu. La Normalización Llingüística tien que tar presente nuna de les conceyalíes”, apuntó nes conclusiones a la so esposición ‘La Oficina de Normalización Llingüística de Xixón: catorce años faciendo camín, pasu ente pasu, pola normalización llingüística’, poniendo como posibilidá la esistencia d’una “conceyalía d’Educación, Cultura y Normalización Llingüística”. “El SNL tien una capacidá tresversal determinada; deberíamos tener más y pa ello necesitamos más apoyu entá, que los xefes de serviciu y conceyalíes apoyen”, siguió Rodríguez López, que tamién demandó un cumplimientu escrupulosu de les lleis por parte de l’Alministración, citando’l casu de la toponimia.

Read Full Post »

L’ociu y el deporte van protagonizar una xornada familiar col asturianu como llingua vehicular nel Día de la Reciella

Yá ta too preparao pa la celebración del V Día de la Reciella esti domingu nel Pueblu d’Asturies. L’ociu y el deporte, principalmente cola II Entaína, protagonicen una xornada en familia con más d’una docena d’actividaes col asturianu como llingua vehicular.

La sala de conferencies del xixonés Centru de Cultura Antigüu Institutu acoyó la presentación ayeri del programa completu d’esta edición del Día de la Reciella, actividá qu’entama ‘Reciella. Families pol Asturianu’. “La intención del Día de la Reciella ye tener una xornada d’ociu familiar y convivencia nel que la llingua asturiana sía vehicular; que nun sía protagonista más allá de ser el vehículu de comunicación”, apuntó’l miembru del coleutivu, que destacó l’aumentu d’actividaes d’ociu y deporte y la intención de “ampliar y ameyorar” lo fecho n’años anteriores.

Read Full Post »

El Proyectu 2018 de la XDLA suma apoyos ente partíos y la universidá

Foro, Podemos y Izquierda Xunida (IX) amosaron el sábadu en Xixón el so sofitu al ‘Proyectu 2018 pola Oficialidá’, cola presencia destacada de l’alcadesa Carmen Moriyón. El rector Santiago García Granda apuntó na so intervención que la Universidá “ta comprometida y apoya la oficialidá”.

Una carpa instalada na cai Tomás y Valiente sirvió pa una presentación que, nun primer momentu, taba prevista pal Festival Arcu Atlánticu y que s’aplazó pola negativa d’Ana Montserrat López Moro, conceyala d’Educación y Cultura, y Raquel Huergo, direutora de la Fundación Municipal de Cultura, Educación y Universidá Popular de permitila por considerala política, una posición que Moriyón refugó díes depués. Sicasí, el cambiu de fecha permitió que’l ‘Proyectu 2018 pola Oficialidá’ ganara en visibilidá y sumara más apoyos entovía, como amosó l’amplia representación de partíos políticos, sindicatos, coleutivos y ámbitos académicos que tuvo l’actu.

Read Full Post »

“Ye importante pa los críos conocer el cancioneru asturianu”, asegura Fonseca

PABLO R. GUARDADO

Más de mediu centenar d’escolinos y escolines de 17 centros escolares de Xixón participaron na quinta edición de Cantar Presta Muncho, que la selmana qu’entra celebra los sos conciertos. El so coordinador, Nacho Fonseca, destaca la importancia d’averar el cancioneru asturianu a la reciella.

Nacíu nel 2012 por iniciativa del entós conceyal de Cultura, Carlos Rubiera, Cantar Presta Muncho tien l’envís de llevar la música coral a los neños y neñes del Primaria d’una manera cenciella, activa y participativa. Dende un primer momentu, Fonseca foi l’encargáu de coordinar el so funcionamientu xunto colos maestros voluntarios responsables de los ensayos, xeneralmente de Llingua Asturiana o Música.

Read Full Post »

El comerciu de Xixón súmase a la promoción del asturianu y la so lliteratura

La Fundación Municipal de Cultura de Xixón y la Unión de Comerciantes presentaron esti martes la primer parte de la campaña de promoción de la llingua asturiana nos comercios llocales. Los escaparates van dar difusión hasta’l día 10 d’obres n’asturianu escrites por muyeres.

La conceyala d’Educación y Cultura, Ana Montserrat López Moro, y Camen Moreno, representante de la Unión de Comerciantes del Principado de Asturias, encargáronse d’informar esta mañana nel Centru de Cultura Antiguu Institutu del alcuerdu sobre la campaña de nome ‘Nel comerciu asturianu yes bienveníu/bienvenida y la lliteratura tamién’, actu nel que tamién estuvo presente María Xosé Rodríguez López, responsable de la Oficina de Normalización Llingüística. La primer de les aiciones previstes ye la esposición nos escaparates de 40 comercios de la ciudá d’una amuesa d’obres n’asturianu escrites por muyeres, coincidiendo cola celebración de la XXXVIII Selmana de les Lletres Asturianes baxo’l lema ‘Lletres, femenín plural’.

Read Full Post »

“Si la familia usa l’asturianu, los neños y les neñes van tener munches ventayes pa deprender otres llingües”, diz López

La Casa Conceyu de Xixón acoyó esti llunes l’actu de presentación del IV Día de la Reciella, que va tener como sede’l domingu’l Muséu del Pueblu d’Asturies. La edil Ana Montserrat López Moro defendió l’usu del asturianu nel llar al consideralo una ventaya “pa deprender otres llingües”.

Xunto a la conceyala d’Eduación y Cultura participó nel actu María Xosé Rodríguez, responsable de la Oficina de Normalización Llingüística; Mario Suárez del Fueyo, de Xixón Sí Puede; y Lara María Martínez Fernández, del PSOE; amás de los representantes de ‘Reciella, Families pol Asturianu’ David Guardado y Iris Díaz que dieron anuncia de toles actividaes que van facese nesta cuarta edición del Día de la Reciella. Tamién tuvieron presentes el realizador Pablo Quiroga y Xandru Vega, gaiteru de Skama la Rede, que presentaron el videu promocional de la xornada y de la carrera.

Read Full Post »

Arcu Lliterariu va dedicar la xornada a la normalización llingüística

L’actividá n’Arcu Lliterariu nun apara y esti vienres tien programaes delles actividaes que nesta xornada van tar dedicaes a la normalización llinguística. La presentación de la espublización ‘Xixón una ciudá abierta al mar’, destinada como complementu pa los escolinos y escolines que faen un percorríu mientres el cursu per Cimavilla, va abrir a les 17.30 hores la cita. Editada pola Oficina de Normalización Llingüística de Xixón, los sos autores son Mercedes Calzada, Xurde Fernández Fernández y María Ángeles García Rodríguez, que van ta presentes nel actu xunto cola conceyala Ana Montserrat López Moro y la responsable del organismu municipal, María Xosé Rodríguez.

A les 18 hores, mentes, va principiar la parte dedicada a la normalización cola intervención de Ramón d’Andrés, que va poner una conferencia sobre delles cuestiones básiques sobre’l debate llingüísticu n’Asturies. Darréu, Fernando de la Fuente, direutor d’Asturies.com, va intervenir como representante de l’Asociación Cultural Ástura nuna presentación d’actividaes xunto con Carlos Pulgar, voceru nacional de la Xunta pola Defensa de la Llingua Asturiana, y Inaciu Galán, presidente d’Iniciativa pol Asturianu.

Read Full Post »

El Colexu Públicu Montevil lleva’l X Ruempi la Mollera

La gala del X Ruempi la Mollera, actividá entamada pola Oficina de Normalización Llingüística de Xixón, tuvo llugar esti martes nel Centru de Cultura Antiguu Institutu. Nella diose a conocer el ganador d’esti añu, que resultó ser el Colexu Públicu Montevil.

L’actu, animáu por Higiénico Papel, contó cola presencia de la conceyala d’Educación y Cultura, Ana Montserrat López Moro, amás de los escolinos y escolines de quintu y sestu de Primaria de les siete escueles participantes na edición 2015-2016: los colexos públicos Alfonso Camín, Cabueñes, Clarín, Honesto Batalón, Jacinto Benavente, Montevil y Xovellanos. A lo llargo del cursu tuvieron que trabayar trés entrugues y afondar na so respuesta al traviés de dibuxos, semeyes, información, maquetes, figures, trabayos na rede o trabayos en comuña.

Read Full Post »