Iniciativa pide a los partíos que pongan al frente de RTPA un director «qu’apueste pol asturianu»

Iniciativa pol Asturianu esixe a los partíos con representación nel Conseyu d’Alministración de RTPA –PSOE, PP, Podemos, Foru y IX–que nomen un director o directora «qu’apueste por polítiques de programación que contribuyan a normalizar l’asturianu y el gallego-asturianu».

Al traviés de nota de prensa, la organización posicionóse depués de que’l director xeneral de RTPA, Antonio Virgili, comunicara esti llunes al Conseyu d’Alministración que va arrenunciar al cargu na xunta del 4 de marzu. Los motivos son personales, según confirmaron a Europa Press fontes cercanes a la RTPA.

Read Full Post »

La Xunta denuncia que l’asturianu sigue reculando na RTPA pola xestión de Virgili

La Xunta pola Defensa de la Llingua Asturiana (XDLA) vieno acabante denunciar esti vienres que l’asturianu sigue reculando en RTPA cola xestión d’Antonio Virgili, como amuesa’l fechu de qu’estes navidaes nun s’emitiera programación infantil n’asturianu o que nel 2018 nun se doblara nin un solu minutu al nuestru idioma.

La Xunta pola Defensa de la Llingua Asturiana (XDLA) denuncia esti día nuna nota de prensa acabante asoleyar qu’esta navidá TPA “siguió afondando nos prexuicios ideolóxicos de la so dirección y sigue ensin facer un apueste pola emisión de conteníos doblaos al asturianu. Asina, mentes les demás cadenes autonómiques del Estáu emitieron programación infantil na llingua de la comunidá y doblaron películes como ‘Astérix, la residencia de los dioses’ o ‘Paddigton’ al so idioma, la televisión asturiana fixo tolo contrario y emitió la versión en castellanu”.

Read Full Post »

La XDLA ya Iniciativa critiquen les postures polítiques alrodiu del asturianu na RTPA

Tres de la comparecencia d’ayeri d’Antonio Virigili na Xunta Xeneral, les crítique de les organizaciones de defensa del idioma nun se ficieron esperar por mor de la falta de compromisu de los partíos y de la direcciópn de la cadena por facer cumplir la Llei d’Usu.

La XDLA criticó nuna nota de prensa esta mañana de xueves a Foru y Ciudadanos por mostrase en contra d’aumentar el porcentaxe d’emisión n’asturianu cuando ye dalgo que marca la Llei d’Usu, que tanto dicen defender cuando nieguen la necesidá de la oficialidá

Read Full Post »

La XDLA denuncia la RTPA como instrumentu d’una FSA vieya pa incumplir la llei d’usu

Nun duru comunicáu nel qu’afita otra vuelta munchos de los sos informes de los años caberos, la Xunta pola Defensa de la Llingua (XDLA) conclúi que la RTPA ye anguaño “un instrumentu d’una FSA vieya pa incumplir una llei d’usu que yá nun val”.

Pala XDLA la RTPA sigue dando’l llombu a la sociedá asturiana con una programación “marcada polos prexuicios ideolóxicos de la so dirección y del conseyeru de Presidencia del Gobiernu d’Asturies, Guillermo Martínez, del que depende RTPA: La televisión pública sigue marxinando los conteníos nel nuestru idioma, l’usu de la toponimia oficial y tratando al nuestru patrimoniu llingüísticu -nos más de los programes-, como una caxigalina que namás val pa facer chancia y pa los conteníos más d’andar per casa. Ye una situación qu’incumple sistemáticamente la Llei d’Usu, a la qu’agora dalgunos tanto s’agarren”.

Read Full Post »

La XDLA denuncia otra vuelta la discriminación de la TPA hacia l’asturianu

La Xunta pola Defensa de la Llingua Asturiana (XDLA) vieno acabante denunciar nun duru comunicáu que la TPA sigue aneciando en dar pasos alantre na so discriminación hacia l’asturianu.

Sigún denuncia la Xunta, “esti pasáu 11 de marzu, TPA programó la película ‘Sherlock Holmes; juego de sombras’ nuna versión doblada al castellanu. Hasta ehí too pue parecer normal nuna cadena como TPA, que polos prexuicios ideolóxicos de la so dirección nun fai apueste pola emisión de conteníos doblaos al asturianu. Sicasí, la denuncia de la Xunta pola Defensa de la Llingua vien porque TPA dobló y emitió hai seis meses ‘Sherlock Holmes: xuegu de solombres’, la versión n’asturianu d’esti llargumetraxe británicu”.

Read Full Post »

La XDLA acusa a la dirección de RTPA de poner los medios públicos al serviciu de los sectores contrarios a la normalización del asturianu

A pesar de que dende’l nacimientu de la canal pública la Xunta pola Defensa de la Llingua Asturiana (XDLA) vien criticando la presencia curtia de la llingua y la cultura asturiana, qu’incumple a les clares l’Estatutu d’Autonomía, la Llei d’Usu y la mesma Llei de Creación de RTPA, nesti momentu queremos mostrar la nuestra esmolición por delles escenes que se vienen viendo nes últimes selmanes na radio y na televisión públiques. La primera, que RTPA nun informara sobre la rueda de prensa que dio l’Academia de la Llingua Asturiana (ALLA) pa denunciar los ataques hacia’l procesu de normalización del asturianu.

Y ye que mentes nel Llar de l’ALLA había micrófonos de los principales medios de comunicación del país, rescamplaba l’ausencia del de la televisión que pagamos toos y toes, que silenció la palabra de la principal institución llingüística asturiana. A pesar d’esto, pocos díes depués, TPA Noticias facíase ecu d’una recoyida de firmes n’Uviéu en favor d’una supuesta ‘libertad lingüística’ de colectivos vinculaos a la estrema derecha y que dicíen defender el derechu a vivir en castellanu nos territorios billingües (¡¡!!). La XDLA nun quier marcar la escaleta de los sos informativos, pero nun tar presente na rueda de prensa d’una institución cultural -y pública- de tanta importancia como ye l’Academia y sí tar informando sobre los actos d’una organización ultraderechista como Hablemos español marca mui bien la llinia ideolóxica que ta siguiendo la cadena baxo’l mandu d’Antonio Virgili.

Read Full Post »

L’Academia pide la dimisión de Virgili, “porque mentes sía director de RTPA l’asturianu nun va tener un usu normal”

El presidente de l’Academia de la Llingua Asturiana, Xosé Antón González Riaño, afirma que mentes Antonio Virgili sía director de RTPA, “la llingua asturiana nun tendrá espacios de dignificación al traviés del so usu normal n’espacios informativos”. Por eso, la institución llingüística pide la so dimisión “inmediata” y va treslladar esta petición a los grupos parllamentarios.

Al traviés d’una nota de prensa, Riaño señala que lleven años calteniendo concersaciones con Virgili pa plantear midíes de visualización y normalización de la llingua asturiana na RTPA. “El resultáu d’estes conversaciones siempre foi frustante, porque siempre aparecía dalgún problema”, apunta.

Read Full Post »

L’Academia de la Llingua pide a la TPA un programa informativu n’asturianu

El Presidente de l’Academia de la Llingua Asturiana, Xosé Antón González Riaño presentó esti llunes al director de la Radiotelevisión del Principáu d’Asturies, Antonio Virgili, una propuesta pa que la televisión autonómica emita un programa informativu n’asturianu.

Riaño tuvo celebró una xunta con Virgili, na que, amás d’otres cuestiones, presentó al Ente de comunicación autonómicu esta propuesta pa entamar un espaciu informativu diariu n’asturianu. Esti entamu afítase nos datos ofrecíos nel III Estudiu Sociollingüísticu d’Asturies, fechos públicos nel ‘Avance de datos’ presentáu’l pasáu mes de xunu.

La propuesta de l’ALLA plantea a la Direición de la RTPA qu’ún de los sos espacios informativos diarios (mediu día o tarde-nueche) seya n’asturianu. L’oxetivu ye que la radiotelevisión pública asturiana contribuya a la dignificación y normalización de la llingua y cultura d’Asturies.

Read Full Post »

RTPA: diez años contra la llingua y la cultura asturiana

XUNTA POLA DEFENSA DE LA LLINGUA ASTURIANA

Acabamos l’añu nel que RTPA tuvo celebrando una década d’existencia. Ensin dulda, no que tien que ver col compromisu que marca la llei cola difusión de la llingua propia, foron diez años con munches sombres y mui poques lluces. Con too, nun vamos dir tan p’atrás; vamos quedar nos últimos 365 díes. Y ye qu’hai poco más d’un añu viemos a un conseyeru d’Educación y Cultura afirmando que RTPA diba dexar d’usar l’asturianu pa facer chancia. Tamién viemos a un director xeneral de RTPA asegurando que yera partidariu del usu del nuestru idioma nos medios públicos. Y viemos a una mayoría de la Xunta Xeneral aprobando’l proyectu d’un plan de dignificación que falaba d’usar la radio y la televisión públiques como ferramienta de normalización llingüística.

Sicasí, pasaron 365 díes y a pesar de los reportaxes trunfalistes sobre tolo bono que supuestamente fixeron en TPA nestos últimos años, col usu del nuestru idioma too sigue igual. L’asturianu namás val pa les pingarates, pa da-y un toque de color y d’humor a una emisora que bien podría emitir dende Madrid -por muncho que nos echen en cara que de vez en cuando van peles caleyes, como si eso yá valiera pa xustificar la so existencia-. Asina, l’usu de la toponimia oficial va p’atrás, nun aparecen programes d’entretenimientos nuevos con un tratamientu dignu pa la cultura asturiana, l’idioma sigue arrequexáu nos usos diglósicos ensin nengún procuru cola corrección y calidá, la programación infantil n’asturianu emítese ensin promoción nos fines de selmana -nuna canal onde l’espectador mediu tien más de 50 años-…

Read Full Post »

La XDLA crítica la política de programación diglósica d’Antonio Virgili

Más de seis meses depués de la renovación nel cargu d’Antonio Virgili, director xeneral de RTPA, la Xunta Pola Defensa de la Llingua diz ver ” los primeros resultaos de la xestión d’una persona que diz ser “partidaria” del asturianu: la programación n’asturianu ta baxo mínimos -más baxo mínimos de lo que yá taba-, nun existe programación infantil y xuvenil n’asturianu y hai añu y mediu que nun se dobla nenguna película al asturianu”.

Pa la Xunta Pola Defensa de la Llingua, “otru tanto se pue dicir de la RPA, onde la presencia del nuestru idioma y la nuestra música ocupa tantu espaciu como’l que-y dedica cualquier emisora de Madrid qu’emite en desconexón p’Asturies. Mentanto, la producción cultural nin asoma nos TPA Noticias, que son siempre en castellanu, menos na Selmana de les Lletres, onde s’usa l’asturianu pa falar del asturianu y ehí acabó esti añu la programación especial”.

Read Full Post »