Alicia Álvarez dedica’l llibru ‘Asturianes’ a muyeres que participaron “na construcción de la nuestra historia”

 PABLO R. GUARDADO

“Nun ye necesario dir mui lloñe pa buscar referentes femeninos” n’Asturies, apunten dende La Fabriquina, qu’asoleya con ‘Asturianes’ el primer títulu del so catálogu pa un públicu adultu y mozu. Alicia Álvarez, apoyada nes ilustraciones de María Ortiz, allega al llector les vides y conquistes de venti muyeres o coleutivos del país “que contribuyeron colos sos llogros a rozar el camín de la igualdá”.

Aida Lafuente, Margarita Salas, Corín Tellado, les cigarreres, Xosefa Xovellanos, la Busdonga o Rosa Fernández son dalgunes de les asturianes que protagonicen esti proyeutu nuevu de la periodista, escritora y música. Persones que “ensin el so inconformismu y la so valentía nun sedría posible recuperar el papel activu que per sieglos se-yos negó a les muyeres na sociedá”, espliquen.

Read Full Post »

La esperada tercer edición de ‘Bestiariu’ aporta esti miércoles a les tiendes d’Asturies

PABLO R. GUARDADO

La primer composición de Nosoträsh depués de dellos años o los primeros temes de composición propia de L-R y Antón Menchaca son dalgunos de los grandes atractivos col que vien la tercer edición de ‘Bestiariu’. Esti discu pa la reciella va ponese a la venta’l miércoles.

Nacíu nel 2015 col oxetivu d’averar l’asturianu al públicu infantil y crear nuevos materiales orixinales pa los neños y neñes nesta llingua, el proyeutu ‘Bestiariu’, un clásicu de les fiestes de Nadal dende hai 3 años, algama la so tercer edición con un discu nel que participen otres doces formaciones asturianes de la escena independiente, folk y rock con cantares orixinales. Losone, Buen Suceso, La Tarrancha, El Koku la Manzana, Nosoträsh, Lorena Álvarez, L-R, Antón Menchaca, Rioturbio, San Jerónimo y Muga y el Corín de Reciella son los convidaos a participar esti añu nel proyeutu, que nos dexa temes sobre una perra sideral, un cocu que ye’l terror del llagar, un esperteyu o una lleona vasca que conoz a un gatu asturianu, ente otres munches histories.

Read Full Post »

La segunda entrega de Bestiariu, con dolce animales nuevos, yá se viende

Tres l’esitu de la primer entrega, ‘Bestiariu 2’, discu producíu por La Fabriquina axunta a 12 nuevos grupos que canten a otros tantos animales. Nacho Vegas, Skama la Rede, ¿Aú? o Herbamora son dalgunos de los participantes.

Son 12 grupos y dolce nuevos animales que van tar presentes en cientos de cases esti Nadal. Bestiariu repite formula na so nueva entrega, pero non participantes, yá que dende La Fabriquina contactóse con nuevos artistes del ricu y variáu panorama musical asturianu. Nacho Vegas y el Coru al altu la lleva, La Bande, Møna, ¿Aú?, Arma X, Skama la rede, La Bonturné, L@s Electric@s, Lavandera, Herbamora y Elle Belga conformen el llistáu de nuevos artistes y grupos asturianos que dan forma a esta nueva entrega de Bestiariu. Sólo repite Muga y el Corín de Reciella, el proyectu musical qu’axunta a los impulsores d’esta iniciativa y al coru de l’asociación Reciella.

Read Full Post »

Alicia Álvarez crea ‘Pulgarina’, un discu-llibru con siete cantares de pop intimista

Yá ta a la venta ‘Pulgarina’, la historia creada pola escritora y música Alicia Álvarez. Trátase d’un discu-llibru con siete cantares de pop intimista y con ilustraciones d’Alicia Varela que cuenta con versión n’asturianu y en castellanu.

“Yera una neña tan pequena que nun consiguía ver les coses con perspectiva…” ye la cita qu’abre ‘Pulgarina’, que fala d’una neña diminuta apesadumbrada pol so tamañu qu’entama un viaxe de descubrimientu personal onde nada ye lo que paez sinón sólo una cuestión de perspectiva. El llector va siguir la historia al traviés de los cantares de la componente de Pauline en la Playa compuestes y interpretaes con guitarres y sintetizadores pola propia música, producíos por Daniel Fletcher y grabaos nos estudios Supersonic.

Read Full Post »

Padilla: “Habría d’esparder los actos de la Selmana de les Lletres Asturianes a lo llargo del añu pa tener más presencia”

Munches actividaes en pocu tiempu. Asina definió esti xueves Fernando Padilla la Selmana de les Lletres Asturianes na inauguración de la IV Feria del Llibru y el Discu n’Asturianu que se celebra n’Avilés hasta’l domingu. “Habría d’esparder los actos de la Selmana de les Lletres a lo llargo del añu pa tener más presencia”, aseguró.

25 actos y 35 actividaes conformen la XXXVII Selmana de les les Lletres Asturianes, “pal mio puntu de vista demasiaos”, asegura’l direutor xeneral de Planificación Llingüística y Normalización, qu’apuesta por espardelo nun futuru a lo llargo del añu pa ganar en presencia y visibilidá. Fíxolo na inauguración de la cuarta edición de la Feria del Llibru y el Discu n’Asturianu, actu nel que tuvo acompañáu por Luis Martín, presidente de l’Asociación de Llibreríes del Principáu d’Asturies; José Antonio García Fernández, xefe de serviciu de Planificación Llingüística y Normalización; y Yolanda Alonso Fernández, segunda teniente d’alcalde y conceyala del Área de Promoción Social, Educación, Ciudá Saludable y Cultura.

Read Full Post »

Edítase Bestiariu, un CD qu’axunta a 10 bandes cantando n’asturianu pa la reciella

Dixebra, Pauline en la Playa, Los Bonsáis o Felpeyu son delles de les bandes que participen nesti trabayu discográficu qu’aporta mañana a les tiendes nuna producción de La Fabriquina editada por Araz Net

Un llobu bonu, dos oricios con raigañu en Verdicio, un gochín que come cereales mirando’l mar o una sacavera que xuega a les cosadielles; son dellos de los protagonistes d’esta decena de cantares enxertaos embaxo del títulu de “Bestiariu” y compuestes a costa fecha polos diferentes artistes.

Read Full Post »

Los medios n’asturianu lleven cuasi’l 50% de les subvenciones

DAMIÁN BARREIRO

El BOPA d’esti 22 d’ochobre publica la resolución pola que se conceden y denieguen subvenciones pa los medios de comunicación pol usu del asturianu y del gallego-asturianu. Son un total de 127.759,63 euros, lo que supón cuasi un terciu de la cuantía cola que contaron nel 2011, que foi de 373.500 euros. Sicasí, nesta ocasión parez que los proyectos con mayor puntuación son los que vienen de medios qu’utilicen n’esclusiva l’asturianu, que se reparten un 47,68% del total de la cuantía. Nel 2010 y 2011, la partida pa estos medios namás supunxo alredor d’un 21% del total.

Ello ye que según les bases de la convocatoria de subvenciones, l’oxetu d’esta midida ye la concesión d’ayudes económiques en réxime de concurrencia competitiva pa empreses periodístiques, radiofóniques, televisives o d’internet, poles inversiones realizaes na producción d’espacios onde s’utilice l’asturianu, o’l gallego-asturianu nel so ámbitu, a lo llargo l’añu 2012, bien de manera habitual n’informaciones xenerales, bien n’espacios periódicos y fixos, bien en programes estraordinarios d’interés especial, «pero siempre que tal usu contribuya a la normalización y dignificación del usu social de la llingua y sían espacios configuraos como propios del mediu de comunicación y asumíos por él».

Read Full Post »