Xaime Martínez y L-R van estrenar ‘Amosando’, ciclu pa presentar les novedaes discográfiques de la música asturiana

PABLO R. GUARDADO

Un conciertu acústicu, con aforu reducíu, y una entrevista que s’emite per Internet a tol planeta. Eso ye ‘Amosando’, propuesta novedosa pa presentar les novedaes discográfiques asturianes que van estrenar el 16 de marzu L-R y Xaime Martínez.

Javier Lueje va encargase de la grabación nos sos estudios de Xixón y Goxe de la producción d’esti proyeutu “pa visibilizar a la música asturiana dientro y fuera de les nuestres fronteres; una ferramienta promocional adaptada a los vezos actuales de consumir música; una iniciativa pionera n’Asturies influyida por otres esperiencies asemeyaes exitoses notres partes del planeta”, espliquen dende Musicasturiana, organizadores de ‘Amosando’. D’esta forma preténdese “valtar ún de los más grandes problemes que tien la música asturiana: la poca promoción”.

Read Full Post »

L’Anuariu de la Música Asturiana repasa’l 2015 nuna edición de baldre

PABLO R. GUARDADO

Anabel Santiago protagoniza la portada del 2015, que tien como mayor novedá la so distribución de baldre. Como ye vezu, la revista inclúi un CD con una escoyeta de lo meyor qu’ufiertó la nuesa música mientres l’añu pasáu.

Goxe Producciones edita un añu más l’Anuariu de la Música Asturiana, espublización que repasa la producción musical del país. La música tradicional, el folk, el rock o la canción d’autor tienen protagonismu nesta revista con seiciones qu’inclúin reportaxes, informes, entrevistes, crítiques, opinión, cróniques, recoyida de material o anuncies.

Read Full Post »

Los creadores culturales mozos analizaron los sos ámbitos de trabayu nel congresu celebráu n’Uviéu

PABLO R. GUARDADO

El Congresu Cultura Asturiana Mozo resultó una perbona ferramienta pa conocer el llabor que se ta faciendo n’Asturies en delles estayes y les mires de los creadores culturales. Éstos foron los protagonistes d’una xornada “que foi un ésitu”.

Con estes pallabres finó Xuan Xosé Sánchez Vicente un congresu que podría tener continuidá n’años vinientes, dalgo que se decidirá nunos dos o trés meses. Ésti ye’l tiempu que van tomar los impulsores d’esta iniciativa, la Fundación Nueva Asturies y l’Asociación Cultural L’Arribada, y los coordinadores de toles estayes pa madurar la esperiencia d’esti primer Congresu Cultura Asturiana Mozo y convocar un conceyu nel que valorar la conveniencia o non de celebrar ediciones nueves.

Read Full Post »

La empresa de servicios d’internet Araz crea una nueva editorial en llingua asturiana

La empresa Araz, dedicada los servicios d’internet y propietaria, ente otres coses, del portal informativo asturies.com, anunció güei la creación de la so estaya editorial n’asturianu.

Al traviés d’una nota prensa, a la que tuvo accesu Europa Press, Araz anunció pal próximu xueves, 10 de xunetu, la presentación de la estaya Araz Llibros, que tendrá llugar a les 20.00 hores nel Salón d’Actos del Centru Municipal de L’Arena.

La empresa esplicó que ye “un proyeutu que naz col enfotu d’ufiertar a los llectores asturianos una serie d’obres que pol so valir científicu y rigor metodolóxicu van merecer l’atención del públicu”.

Según el testu, “la prioridá d’Araz Llibros ye abrir al llector a nuevos campos de conocimientu, hasta agora mui poco o nada trataos na nuesa llingua y, a lo menos na so primer etapa d’esistencia, con dos oxetivos claros: el xéneru ensayísticu como exa de les obres (l’ensayu na so estaya científica, técnica o humanística) y l’usu de asturianu como llingua vehicular de les publicaciones”.

Nel actu tarán los autores de los trés primeros títulos editaos por Araz Llibros: Faustino Zapico Álvarez, autor de ‘El nacimientu d’una nación. Historia de Sudáfrica’; Xabiel García Pañeda y Rubén Sánchez Antuña, autores de ‘Dos visiones asturianes de les nueves tecnoloxíes’; y David Guardado Diez, autor de ‘Llingua estándar y normalización llingüística’.

(d’Europa Press, 07-07-2008)

Read Full Post »