Feeds:
Antradas
Comentairos

Posts Tagged ‘Asociación Cultural Bicentenariu de Samartín del Rei Aurelio’

Hai dellos años llegó a Asturies la fiebre de les ‘escape rooms’, fenómenu nacíu nos Estaos Xuníos y Xapón con munchu ésitu nel país, sobre manera na xente mozo. Consiste en pasar una serie de pruebes n’equipu, al traviés de la resolución d’enigmes o misterios tres recibir pistes, pa salir del cuartu nel que se ta, con un tiempu llendáu pa ello.

El Conceyu de Samartín del Rei Auremio y l’Asociación Cultural Bicentenariu de Samartín del Rei Aurelio vieron les posibilidaes d’esta forma d’ociu nueva y decidieron entamar ‘El tesoru del rei Aurelio’ pa dar a conocer la historia del conceyu y normalizar l’usu del asturianu. “La trama desendólcase na sala privada d’un coleccionista onde falta la pieza más valoratible, la Cruz d’Aquisgrán, que’l mesmu Carlomagno regalara al Rei Aurelio y qu’hasta la so desaparición demientres les guerres carlistes formaba parte del bastón de mandu de los alcaldes de Samartín del Rei Aurelio, fechu con un vara d’ablanal y que recibió’l primer alcalde cuando se constituyó´l conceyu nel 1837. Una cruz que foi robada y que los participantes na actividá tendrán qu’alcontrar…, o non”, espliquen los sos organizadores.

La sala d’escape nun va ser fixa, sinón que va desendolcase namái mientres dos díes na Casa de la Mocedá de Sotrondio, en concreto mañana y el sábadu. Ye de baldre y van entamase dos pases cada día, con un máximo de 9 persones por grupu, a les 18 y a les 20 hores, siendo necesario inscribise previamente.

(d’Asturies.com, 20-06-2019)

Read Full Post »